Жена од Бразил станала полицајка за да го фати убиецот на татко ѝ – го уапсила 25 години по убиството

Детали

понеделник, 18 ноември 2024

36-годишна полицајка од Бразил го посветила целиот живот на барањето на убиецот на нејзиниот татко. Конечно, 25 години подоцна, трудот се исплатил и таа самата го уапсила.

Гислејн Сила де Деус од Бразил го изгубила својот татко пред 25 години, откако бил убиен.

Убиецот бил во бегство сè досега и неодамна бил уапсен благодарение на храбрата 36-годишна Гислејн.

Со цел да ја задоволи правдата, Гислејн студирала право и станала полицајка, за на крај самата да го најде убиецот на татко ѝ.

Криминалецот Алвес Гомез, кој веќе имал полициско досие, бил во бегство уште од 2016-та, а бил уапсен во септември годинава.

Поради убиството на татко ѝ, на 18-годишна возраст Гислејн се запишала на правен факултет за да стане адвокатка.

Положила и испит за да може да работи како полицаец, а во еден период била вработена и во затвор.

„Кога работев во затворот, постојано си замислував како убиецот на татко ми доаѓа овде за да си ја отслужи казната“, раскажува Гислејн за локален медиум.

Потоа, таа се вработила како полициски службеник и станала дел од тимот за истражување убиства.

Овде, напорно работела за да собере информации за убиецот на татко ѝ, за на крај да го лоцира и да помогне во неговото апсење.

Алвес Гомез го убил таткото на Гислејн во 1999-та, но бил прогласен за виновен дури во 2013-та.

Кога по него била пуштена потерница во 2016-та, тој избегал и оттогаш му се изгубила секаква трага.

Гислејн открива дека татко ѝ бил ладнокрвно убиен за долг од само 20-тина евра.

Имено, убиецот бил добавувач во супермаркет каде што татко ѝ должел околу 20 евра.

На 16-ти февруари 1999 година, убиецот дошол во близина на домот на Гислејн и си ги побарал парите.

Тогаш татко ѝ му понудил да му даде ладилник бидејќи во моментот ја немал таа сума.

Убиецот, гневен, ја одбил понудата, си заминал, но се вратил половина час подоцна со пиштол.

Почнал тепачка со таткото на Гислејн и го застрелал.

Татко ѝ веднаш бил однесен во болница, но им подлегнал на повредите.

Убиецот веднаш избегал, но бил уапсен истиот ден.

Сепак, поради некоја причина, бил ослободен пред воопшто да почне судењето.

Кога конечно бил фатен и осуден во 2013-та, Гислејн вели дека не ѝ е јасно зошто потерницата за неговото апсење била пуштена дури три години подоцна, со што му се укажал можност да избега.

По неодамнешното апсење, убиецот бил испратен во затвор, но не е познато колку долго ќе остане таму.

„Со неговото апсење, како да си ја исчистив душата… Денес јас и семејството имаме мир бидејќи правдата е задоволена.

Ова нема да го врати татко ми, но убиецот ќе ја отслужи казната што требаше да ја отслужи пред многу години“, додава Гислејн.

Спирова С. | Црнобело