„Татко ми ме малтретираше, морав да вежбам по 12 часа дневно“: Каде е денес „најсилното дете во светот“?

Детали

сабота, 15 февруари 2025

Ричард Сандрак стана светска сензација бидејќи уште пред десетиот роденден, одеше на натпревари за бодибилдинг. Иако тогаш тврдеше дека никој не го присилувал, сега открива дека татко му го малтретирал и го терал да стане бодибилдер.

Дали се сеќавате на Ричард Сандрак кој пред повеќе од две децении го носеше епитетот „најсилното дете во светот“?

На само 6-годишна возраст, Ричард, кој е роден во Украина, имаше стомачни мускули на кои ви завиделе и бодибилдерите, а уште пред да стане адолесцент креваше тегови од 95 килограми.

Откако со семејството се преселиле во САД, Ричард стана глобална сензација и редовно одеше на натпревари за бодибилдери, без разлика што немаше ни десет години.

На почетокот, јавноста се восхитуваше на неговата сила, но откако во 2005 беше снимен документарец за него, многумина изразија загриженост за строгите тренинзи на Ричард.

Некои ги обвинуваа родителите дека му давале и стероиди, а беа критикувани и бидејќи го терале да следи посебна исхрана за да може да ја одржи формата.

На 15-годишна возраст, во интервју за The Guardian Ричард тврдеше дека не правел ништо против своја волја и дека родителите само му овозможиле да си ја исполни желбата да стане бодибилдер.

Но сега, на 32-годишна возраст, во искрено интервју за магазинот Metro, Ричард зборува за тортурата што ја трпел.

Како што претпоставува многумина, Ричард вели дека татко му Павел го малтретирал и физички и психички, како и дека тој го терал да стане бодибилдер.

„Татко ми стануваше многу гневен и ме тераше да тренирам по 12 часа.

Многупати се случило најобичен тренинг да се претвори во ситуација во којашто се чувствував како да сум заложник“.

Ричард морал да тренира секој ден – наутро боречки вештини, а потоа вежби со тегови.

Но, дури и кога му дозволувале да гледа телевизија, морал да прави чучнувања.

Татко му бил насилен и кон мајката на Ричард – Лена – а поради инцидент во 2003 година, завршил во затвор, а потоа и бил депортиран во Украина.

Ричард вели дека оттогаш како одново да почнал да живее.

Првпат во животот пробал брза храна, а имал време да стекне и пријатели.

Иако, вели дека како тинејџер бил многу повлечен бидејќи целото детство го поминал изолиран од врсниците.

Конечно, на 16-годишна возраст, Ричард сфатил дека воопшто не сака бодибилдинг, се откажал од спортот и одлучил да се повлече од јавниот живот.

Сепак, малтретирањето од татко му му донело и друг проблем – алкохолизам.

Бидејќи бил славна личност од рана возраст, Ричард присуствувал на настани каде што му било дозволувано да пие.

Вели, првпат пробал алкохол на само деветгодишна возраст и битката со алкохолизмот ја водел до неодамна.

Со алкохолот пробувал да си го оттргне вниманието од тагата и депресивните мисли.

Ричард гордо вели дека е трезен веќе цела година и иако не сака да биде бодибилдер, планира да почне кариера како личен тренер и нутриционист.

Моментално работи како менаџер во продавница и живее во Лос Анџелес со неговата девојка.

„Кога ќе помислам низ што сум преживеал, се чувствувам како тоа да е некоја друга личност.

Можам да кажам дека денес сум генерално среќен за мојот живот“, завршува тој.

Спирова С. | Црнобело