Почина папата Франциск на 88 години

Детали

понеделник, 21 април 2025

Ѕвоната на црквите ѕвонат низ Рим, а Ватикан ја потврди смртта на папата Франциск, кој целиот свој живот го посвети на „служба на Црквата“.

Кардинал Кевин Фарел ја објави тажната вест дека Папата починал денес (21.04) околу 7:30 часот.

Осумдесет и осумгодишниот папа се соочуваше со здравствени проблеми неколку месеци, откако на 14 февруари беше хоспитализиран во болница во Рим поради бронхитис, кој премина во пневмонија.

По неговиот 38-дневен престој во болница, настаните на Папата беа откажани. Оттогаш, Ватикан редовно даваше извештаи за неговата здравствена состојба, а денешното соопштение дојде само неколку часа по неговиот благослов за Велигден во неделата.

Кардинал Фарел ја објави тажната вест:

„Најдраги браќа и сестри, со длабока тага морам да ја објавам смртта на нашиот Свет Отец Франциск. Во 7:35 часот, епископот на Рим, Франциск, се врати во домот на Отецот.

Целиот негов живот беше посветен на службата на Господ и Неговата Црква. Не научи да ги живееме вредностите на Евангелието со верност, храброст и универзална љубов, особено во полза на најсиромашните и најмаргинализираните“.

Папата Франциск ја презеде папската должност во 2013 година по оставката на папата Бенедикт XVI. Тој беше познат по своите активности во борбата против климатските промени и критиката кон потрошувачкото општество.

Прочитајте и Уништување на папскиот прстен, таинствена конклава: Што се случува откако ќе почине папа?

С. С. | Црнобело