Вознемирувачко видео: Избеган лав кој бил чуван како миленик нападна жена и 2 деца во Пакистан

Детали

вторник, 08 јули 2025

Минатата недела, од двор во престолнината на Пакистан избегал лав кој нападна жена и две деца. Иако се повредени, тие не се во критична состојба, а надлежните открија дека веќе ги уапсиле сопствениците кои нелегално го чувале лавот, и тоа во населено место.

Чувањето лавови, тигри и слични животни како миленици е забрането во скоро секоја држава или барем треба да се поседува соодветна дозвола.

Но, некои луѓе нелегално успеваат да допрат до вакви миленици и ги чуваат, без разлика што се изложуваат на ризик не само себеси, туку и другите во нивната околина.

Дека чувањето вакво животно како миленик е опасно покажа и неодамнешен инцидент во Пакистан во кој, за среќа, немаше жртви.

Во Лахор, престолнината на Пакистан, семејство со голема куќа во богато соседство на градот чувало лав.  Но, во четвртокот (03.07), лавот побегнал и нападнал жена и две деца.

Локалната полиција сподели и видео направено со безбедносна камера на кое се гледа страшниот момент.

На видеото се гледа како лавот го прескокнува бетонскиот ѕид што го оградува имотот и веднаш тргнува кон жена која во тој миг поминува оттаму.

Жената некако успева да побегне, а оддалеку се гледа како лавот пробува да нападне и две деца.

Според полицијата, децата биле на возраст од 5 и 7 години, а заедно со жената веднаш биле пренесени во болница.

Жената и децата се здобиле сo повреди на лицето и рацете, но сите тројца биле во стабилна состојба.

Од полицијата открија и дека лавот бил заловен и испратен кај надлежните институции за да му се најде соодветен дом.

Надлежните велат дека луѓето кои го чувале лавот немале соодветна лиценца, поради што кривично ќе одговараат и може да добијат затворска казна во траење до седум години и парична казна од околу 17.000 евра.

„Ќе ја бараме највисоката казна бидејќи лавот бил чуван нелегално“, велат надлежните во изјава за CNN.

Чувањето лавови во Пакистан се гледа како статусен симбол и не е реткост. Но, оние кои сакаат да чуваат лав како миленик, треба да имаат соодветна дозвола. Исто така, не смеат да го чуваат животното во населено место.

„Овој несреќен инцидент покажува како дивите животни честопати се чувани без лиценца или дозвола, со што се загрозуваат животите на многу луѓе“, велат од полицијата.

Надлежните соопштија и дека почнуваат акција за да ги лоцираат луѓето кои чуваат лавови без лиценца и досега заловиле 18 животни, а уапсиле пет лица.

Погледнете го видеото:

Спирова С. | Црнобело