Стен Ли, креаторот на Марвел Универзумот, почина на 95 години

Детали

вторник, 13 ноември 2018

Стен Ли, популарниот американски писател на стрипови, почина на 95 годишна возраст. Тој беше сопственик на Марвел издавачката куќа за стрипови и креатор на најпознатите стрип јунаци од актуелните блокбастер филмски адаптации како што се: Спајдермен, Ајрон Мен, Хулк, Фантастичната четворка, Авенџерс и други.

Причината за неговата смрт не е позната. Адвокатот на ќерката на Ли изјавил дека креаторот на стрип јунаците бил однесен од неговиот дом во Лос Анџелес со амбулантно возило во медицинскиот центар Сидар Синаи во понеделник изутрина, каде што подоцна и починал.

Стен Ли ја започнал својата кариера во стрип индустријата уште во 1939 година во тогашната Timely Comics. 

Тогаш работел како писател, уредник и понекогаш и илустратор, но бидејќи бргу му досадила ограничената работа, наскоро, започнал свој бизнис како конкуренција на тогаш најголемата куќа за стрипови DC (тогаш познати како National Comics).

Во раните '60-ти години на минатиот век, Стен Ли добил задача да создаде тим на супер херои коишто ќе бидат конкуренција на Justice League на DC. 

Овој период го означува почетокот на златната ера на стрип бизнисот, а компанијата на Стен Ли, Marvel ги ревитализира стрип јунаците со тоа што им дава поголема длабочина на ликовите и креира почовечки суперхерои со маани и проблеми.

Прво, како конкуренција се појавиле Fantastic Four, а подоцна и X-Мen, за на крај да дојде вистинскиот пандан на Justice League, олицетворен во групата Avengers.

Во 1972 година Стен Ли станал главен уредник на Марвел, а подоцна продолжува сè повеќе да го шири брендот, па дури и да се појавува во голем дел од филмските адаптации на своите супер херои, во споредна кратка камео улога.

И покрај овој голем успех на неговите креации, Ли не успеал да ја инкасира во голема мера нивната популарност, барем не во споредба со успехот на филмовите и фирмата Marvel. Неговото богатство се проценува на 50 милиони долари.

Трагедијата го погоди Стен Ли лани, кога почина неговата жена на 95 години со којашто беше во брак цели 69 години. 

Тие биле многу блиски и негувале вистинско партнерство, а таа, исто така, се појави во последниот X-Мen филм, па затоа не е ни чудно што неполна година подоцна почина и Стен на истата возраст како и жена му.

(О)Милена | Црнобело