Мајка, што го штитела синот во сообраќајна незгода, се разбуди по 27 години кома

Детали

среда, 24 април 2019

Кога имала 32 години таа го обвила своето тело околу 4-годишниот син за да го заштити. 27 години подоцна оваа пожртвувана мајка се разбудила од кома и го изговорила неговото име.

Мунира Абдула од Обединетите Арапски Емирати имала сообраќајна незгода во 1991 година. Таа се разбудила по 27 години во вегетативна состојба.

Имала 32 години кога добила сериозна повреда на мозокот откако автомобилот во кој се возела бил удрен од автобус.

Но, минатата година по рехабилитација во Германија почнала да испушта звуци за да го довикне својот син Омар кој го слушнала како се кара со медицинскиот персонал.

Малку подоцна таа убаво го изговорила неговото име за првпат по децении, а сега веќе може да разговара со своите блиски.

Синот на Мунира за медиумите откри дека сообраќајната незгода се случила кога тој имал само 4 години и таа го земала од градинка. Роднина ја одвел Мунира до училиштето, а на враќање доживеале сообраќајна незгода.

Мунира и Омар седеле на задното седиште и таа го обвила синот со своето тело за да го заштити од ударот. Како резултат на тоа таа имала сериозни повреди, а тој минал само со гребнатини.

Потоа со часови не успеале да добијат помош, а откако Мунира била префрлена на клиника во Лондон било прогласено дека е во вегетативна состојба и може да чувствува само болка.

Била вратена во Обединетите Арапски Емирати хранета вештачки и приврзана на апарати.

Но, во април 2017 година од принцот на Абу Даби добиле помош за третман во Германија со операција и една година потоа таа се освестила.

„Тоа беше таа. Ме викаше по име. Летав од радост. Со години сонував за овој миг и првиот збор што го кажа беше моето име“, изјави пресреќниот Омар.

С. С. | Црнобело