Во Австралија конечно заврна дожд – луѓето му се радуваат, но има опасност од поплави (фото)

Детали

четврток, 16 јануари 2020

Во делови од Нов Јужен Велс и Викторија заврна долгоочекуваниот дожд, а силните бури предизвикаа поплава во Мелбурн.

Сепак, на овие места сè уште има над 80 активни пожари, а во националниот парк во Викторија од грмотевици започнаа и два нови.

Пред една недела имаше слаби врнежи од дожд во источниот дел на Австралија, но не беа од голема помош.

Овојпат дождовите дефинитивно ќе им помогнат на пожарникарите, но метеоролозите сè уште не се сигурни дали ќе бидат доволно за да направат разлика во најсувите делови.

Властите се загрижени дека можно е да се појават и огромни поплави, особено во сувите региони, бидејќи земјата е толку сува, што водата само се „лизга“ по неа без да се впива.

Дождовите направија и своја штета, а според податоците, на некои места наврнало колку за цел месец.

Од денес до недела се очекуваат уште пообилни врнежи, а властите се сигурни дека, ако ништо друго, барем ќе помогнат во контролирањето на пожарите.

И покрај штетата што ја предизвикуваат, дождовите очигледно се вистинска радост за пожарникарите, фармерите и останатите жители на континентот.

Социјалните мрежи се преплавени со фотографии на кои луѓето му се радуваат и заблагодаруваат на дождот.

Спирова С. | Црнобело