Првото лансирање на астронаути од SpaceX одложено заради лоши временски услови - Зошто е важна оваа мисија?

Детали

четврток, 28 мај 2020

Компанијата на Илон Маск, SpaceX, во соработка со НАСА, работи на една од поважните вселенски мисии од изминативе неколку години.

Ова е првата мисија со екипаж на SpaceX, но и првото лансирање на астронаути од американска почва, после речиси цела деценија.

Мисијата е наречена Demo-2, а екипажот го сочинуваат астронаутите Боб Бенкен и Даг Харли. Боб и Даг ќе бидат лансирани од Флорида, во капсулата Crew Dragon, со помош на ракетата Falcon 9.

Првото лансирање беше закажано за вчера (27.05.2020), но се откажа поради лошите временски услови.

Со капсулата Crew Dragon, астронаутите ќе одат до Меѓународната вселенска станица каде што ќе останат некој период, а потоа ќе бидат вратени на Земјата.

Астронаутите Боб и Даг на вчерашното откажано лансирање

Оваа мисија е од голема важност бидејќи е првото лансирање на екипаж од САД, од јули 2011-та. Оттогаш, НАСА го користи руското летало за превоз на астронаути до Станицата, и тоа по цена од 90 милиони долари за човек. Па, целта на оваа соработка со SpaceX е намалување на трошоците и еден вид независност на НАСА за вселенските патувања.

Според администратор на НАСА, Џим Бриденстајн, оваа мисија ќе ни го олесни и патот до Месечината, а со тоа и потенцијалното патување до Марс.

Леталото на SpaceX може да се користи за повеќе мисии и лансирања, што дополнително ги намалува трошоците. А, оваа мисија ќе биде еден вид тест за тоа дали леталото може редовно да се користи за летови до и од Меѓународната вселенска станица.

Ако мисијата се покаже како успешна, од SpaceX планираат следната година да испратат и вселенски туристи, заедно со астронаутите.

Како што напоменавме, поради лошите временски услови вчерашното лансирање беше одложено, а следното е закажано за 30-ти мај.

Спирова С. | Црнобело