Во англиско гратче повторно се вклучени новогодишните светилки: „Ни треба малку светлина во овој мрачен локдаун“

Детали

четврток, 11 февруари 2021

Поради локдаунот во Англија кој започна околу Нова година, жителите на едно гратче воопшто немале можност да уживаат во новогодишните светилки. Сега, одлучиле да ги вклучат уште еднаш, за да внесат барем малку светлина во мрачниот период.

Во гратчето Танкертон во англискиот округ Кент, жителите повторно уживаат во новогодишните украси.

На крајот на јануари, новогодишните сијалички низ градот биле изгаснати, но сега локалните власти и жителите решиле повторно да ги вклучат.

Деновиве градот го завеал снег, а бидејќи повеќето жители се чувствувале депресивно поради „локдаунот“ во Англија, и тие и властите се согласиле повторно да ги вклучат новогодишните светилки.

Жителите не само што ја поддржале идејата, туку голем број почнале да донираат и пари со кои ќе се покријат трошоците.

Идејата ја предложиле од здружението Talk of Tankerton, кое е одговорно за новогодишното украсување на градот.

„За време на новогодишните празници, жителите навистина уживаа во украсите. Но, поради локдаунот кој почна веднаш после Божиќ и Нова година, никој не го напушташе домот и логично беше порано да ги исклучиме светилките. Тој период беше навистина мрачно низ градот.

Но, бидејќи на секој му треба малку светлина во овој тежок период, почнавме да разговараме за идејата повторно да ги вклучиме новогодишните светилки низ градот“, вели Џули Корк, еден од основачите на здружението, за англиските медиуми.

Здружението собрало и над 1.300 долари од локалните жители за да се покријат трошоците за реализирање на идејата, а бидејќи им биле потребни само околу 400, останатите пари ќе ги чуваат за следниот декември.

Спирова С. | Црнобело