„Тоа не е болест!“ – Грета Тунберг со моќна порака по повод Светскиот ден на аутизмот

Детали

сабота, 03 април 2021

Грета Тунберг, која има Аспергеров синдром, се огласи по повод Светскиот ден на аутизмот, обидувајќи се да ѝ покаже на јавноста дека ова не е болест, но и да им помогне на луѓето да престанат да веруваат во сите стереотипи поврзани со ова нарушување.

Април е прогласен за месец на аутизмот, а на 2-ри април се обележува Светскиот ден на аутизмот. Овој ден се прославува веќе 14 години, а целта е да се подигне свеста и да им се стави крај на предрасудите и стереотипите за луѓето кои имаат какво било нарушување од спектарот на аутизмот.

Една од овие личности е и младата активистка Грета Тунберг, која на 12-годишна возраст била дијагностицирана со Аспергеров синдром.

Сакајќи да ѝ помогне на јавноста да престане да верува во стереотипите поврзани со аутизмот, таа сподели моќна порака:

„На 12-годишна возраст бев дијагностицирана со Аспергеров синдром, вид аутизам. Тогаш не знаев што значи. Кога јас и родителите им кажувавме на другите дека имам аутизам, секогаш беа шокирани бидејќи јас не се вклопував во стереотипот за луѓето со аутизам.

Денес толку многу луѓе (особено женски) остануваат недијагностицирани. Причината за ова најчесто е незнаењето, предрасудите и фактот дека многумина го гледаат аутизмот како 'болест' или нешто што не ти дозволува да се движиш напред. Тоа што повеќе и повеќе луѓе се дијагностицирани со аутизам не значи дека има 'инфлација' на дијагнози, но бидејќи се зголемува свесноста и голем број чувствителни луѓе искусуваат проблеми поврзани со стресот во модерното општество, имаат причина да се сомневаат дека се на спектарот.

Речиси секаде има недостаток од ресурси за да им се даде неопходната поддршка на луѓето со аутизам. Без овие приспособувања, аутизмот може да се претвори во попреченост. Но, во добри улови, може да биде дар и да се претвори во нешто од коишто вие – и општеството – ќе имате корист. За жал, денес нивото на свесност е премногу ниско. Многумина не се дијагностицирани, па затоа не ја добиваат помошта што им треба и можно е да го поминат целиот живот верувајќи дека нешто не е во ред со нив.

Па, ајде да се здружиме во зголемувањето на свесноста. Ова буквално може да спаси животи. Аутизмот не е болест. Ова не е нешто што го 'имате'. Тоа дефинитивно не е нешто 'причинето' од работи како вакцина или исхрана. Тоа, едноставно, значи дека вие сте малку поразлични од сите други.

А, во светот каде што сите сакаат да се однесуваат, да размислуваат и да изгледаат исто – да се биде различен е нешто на коешто треба да се биде многу горд.

Затоа, јас сум многу горда што имам аутизам“.

Спирова С. | Црнобело