Порано имала проблеми со неплодност, а сега секоја година е бремена – мајка од САД го роди 16-тото дете

Детали

вторник, 11 мај 2021

Пати Хернандез од Северна Каролина го роди 16-тото дете по ред и ја продолжи нејзината невообичаена традиција името на детето да започнува на буквата K (англ. C), исто како и името на нејзиниот сопруг Карлос.

Откако го родила синот Карлос Џуниор, Пати забременувала три месеци по секое ново породување. Пати и Карлос се запознале во црква во 2007-мата година и никогаш не користеле контрацепција. Велат дека било „божја волја да имаат толку многу деца“.

„Никогаш не верувавме дека ќе имаме толку многу деца. Имав проблем да забременам со Карлос цели две години... Мислам дека моето тело не беше подготвено“ - изјави Пати кога ја најави 16-тата по ред бременост.

Бебето Клејтон е најновиот член на семејството Хернандез, а и неговото име започнува на буквата К. Сепак, таа открива дека овојпат имале проблем за да се сетат на име што почнува на оваа буква.

„Не можевме да смислиме име и името Клејтон само ми падна на ум. Сите деца имаат имиња што почнуваат на буквата К и сакавме да ја продолжиме таа традиција. Сопругот се вика Карлос... Тоа е во негова чест“ - вели таа, пренесува Mirror.

„Бог нè благословил со сите овие деца и знам дека некои луѓе не се согласуваат и има злобни коментари на интернет, но за нас тоа е благослов. Никогаш не мислев дека ќе имам големо семејство, сè додека не почнав да раѓам бебиња. Потоа си помислив дека тоа е 'кул'. Зошто да не? Ако Бог сака да имаме уште деца, тогаш ќе имаме“ – вели таа.

Последен пат Пати се породила на 5-ти мај во 40-тата недела од бременоста. Таа вели дека најголем дел од сестрите ја препознале кога отишла да се породува.

Инаку, иако семејството Хернандез брои невообичаено многу членови, тие не добиваат никаква владина поддршка. Двојката има сопствен бизнис со компанија за чистење и заработува доволно, а се надеваат дека нивниот најстар син Карлос Џуниор (13) наскоро ќе може да помогне во семејниот бизнис.

Двојката има три пара близнаци: Карла и Кејтлин (10), Келвин и Кетрин (6) и Кајлеб и Керолин (3). Покрај нив, тие се родители и на: Карлос Џуниор (13), Кристофер (11), Кристијан (9), Селест (8), Кристина (7), Керол (4), Камила (2), Шарлот (1), Кристал (1) и новороденото бебе.

По ова лесно може да се заклучи дека Пати е бремена речиси секоја година од 2008-мата па наваму.

Б. С. Б. | Црнобело