Мајка горда на емотивниот потег на синот – прифатил да биде партнер за матура на непозната девојка со физичка попреченост

Детали

вторник, 18 мај 2021

Кога мајката на 17-годишниот Карсон му кажала за Изи - девојка со попреченост која останала без партнер за матурска - тој без двоумење ѝ рекол дека тој ќе оди со неа и си го исполнил ветувањето.

17-годишната Изабел, односно Изи, се подготвувала за нејзината матурска вечер која со нетрпение ја очекувала, но нејзиниот партнер се разболел па таа немала со кого да оди. Изи е лице со попреченост и не може да се движи без помош на инвалидска количка.

Не знаејќи што друго да прави, нејзината мајка Синди ја споделила приказната во Фејсбук група:

„Мојата прерасна ќерка Изабел има 16 години и е во инвалидска количка. Зборувавме за матурската и сега нејзиниот партнер не може да оди. Дали има некое младо момче кое би сакало да присуствува на матурската за лица со попреченост со оваа прекрасна девојка?“

Објавата ја здогледала жена по име Трина Прис и веднаш почнала да плаче. Во тој момент, во собата влегол синот на Трина, Карсон, и ја прашал што се случува. Кога таа му кажала, 17-годишното момче без двоумење рекло дека тоа ќе оди на матурска со Изабел.

Карсон си го одржал ветувањето, а подоцна неговата мајка ја сподели приказната на Фејсбук, заедно со неколку фотки од посебниот ден:

„Пред неколку недели плачев и Карсон ме праша што е проблемот. Му ја прочитав Фејсбук објавата од мајка на 16-годишно девојче со попреченост, на кое му треба партнер за да оди на нејзината матурска. Тој ми рече: ’Мамо, јас ќе одам‘.

И, навистина отиде! Денот пред матурската бевме кај неа за да ја украсиме собата на Изи и за да се запознаат со Карсон. Потоа, тој беше со неа на матурската вечер. По матурската беа во нејзината соба повеќе од еден час и заедно гледаа цртани!

Изи не може да зборува, се движи со инвалидска количка и обично не комуницира. Но, имаше неколку моменти каде што нејзиниот поглед се сретна со оној на Карсон и можев да ја видам среќата во нејзините очи, но и во неговите.

Ова е само приказна за момче кое со гордост го нарекувам син!“

По матурската, Карсон и Изи не контактирале, но младото момче ѝ напишало порака на мајката на Изи во која се заблагодарува за можноста да ѝ прави друштво на нејзината ќерка.

Тој дури ѝ рекол дека ако има потреба, со задоволство повторно би ѝ правел друштво на Изи. Карсон рекол и дека штом ќе заврши учебната година, ќе оди да ја посети Изи за да гледаат цртани и да се дружат.

Приказната привлече многу внимание ширум светот, па пред некој ден се огласи и мајката на Изи на нејзиниот Фејсбук профил:

„Имам безброј пораки со прекрасни зборови. Викендов, светот стана малку помал“.

Спирова С. | Црнобело