По 8 спонтани абортуси и мртвородено бебе, пар го доби првото дете: „Тој е нашето божиќно чудо“

Детали

вторник, 28 декември 2021

„За нас е вистинско чудо што станавме родители“ – по 8 спонтани абортуси и едно мртвородено бебе, пар од Австралија конечно го дочека првото дете што се родило на само една недела пред празниците.

Кариса (33) и Дејв Морис (32) од Западна Австралија цели 13 години се обидувале да станат родители.

По осум спонтани абортуси и едно мртвородено бебе, годинава во април дознале дека очекуваат бебе по првиот циклус ин-витро оплодување, а на 17-ти декември го добиле синот Оливер.

Кариса вели дека со години се обидувале да станат родители по природен пат, но често се случувало по шестата недела од бременоста таа да има спонтан абортус и да го загуби бебето.

„Направивме тестови и дознавме дека еден од моите канали е блокиран и поради тоа течностите се враќаа повторно во матката што практично делуваше како отров.

Откако ми го отстранија каналот, дознавме дека имаме проблем со плодноста и од страна на партнерот“ – вели таа.

По ова Кариса и Дејв се обиделе со ин-витро оплодување и веднаш по првиот циклус таа останала бремена.

„Кога дознав дека сум бремена, тоа најверојатно беше најубавото чувство што сум го почувствувала, но заостанува зад чувството кога за првпат го зедов синот во раце“ – вели таа.

Сепак, породувањето, не поминало без проблеми, затоа што малиот Оливер се родил три недели порано, а поради здравствената состојба морал веднаш да биде ставен во инкубатор.

Кариса и Дејв празниците ги поминаа во болница каде сè уште е сместено нивното новородено бебе, но и покрај големиот број предизвици, новите родители се пресреќни што конечно го дочекаа своето прво дете.

„Тоа што го држев Оливер за првпат во раце беше магично. Тој дефинитивно сите нè врти околу прстот. Во моментов го хранат преку цевче во носот.

Празниците ќе ги поминеме заедно со него во болницата, а Божиќ ќе го прославиме кога ќе го пуштат од болница и тогаш ќе му ги дадеме сите подароци.

Навистина беше вистинско чудо тоа што знаеме дека успеавме да станеме родители“ – вели таа.

Б. С. Б. | Црнобело