Девојче (10) од Русија преживеало 18 часа на -11 степени прегрнувајќи се со улично куче (фото)

Детали

понеделник, 24 јануари 2022

Кога 10-годишната Вика си одела накај дома, почнала снежна бура поради што се изгубила. По цели 18 часа, девојчето било пронајдено под тераса, а вели дека ги преживеало ниските температури кои се спуштиле до -11 степени прегрнувајќи улично куче.

Вика има 10 години и живее во Углегорск – град на најголемиот руски остров Сахалин. На 13 јануари, додека се враќала од училиште почнало да врне снег, по што малата Вика се изгубила.

Нејзиното семејство се подготвувало за најлошото бидејќи не само што во областа имало бура и снежна покривка од 60 сантиметри, туку и температурите се спуштиле до -11 степени Целзиусови.

По 18 часа, полицијата успеала да го најде девојчето кое го преживеало студот благодарение на улично куче. Самото девојче изјавило дека ја поминало ноќта „прегрнувајќи меко улично куче“ за да се стопли.

„Вистинско чудо е што девојчето преживеало такви временски услови“, вели еден од локалците кој учествувал по потрагата.

Полицијата ја нашла Вика под ниска тераса кој нудела некаква заштита од бурата. Таа и кучето лежеле на стар душек кој бил оставен од локалците како креветче за улични кучиња.

Вика имала и смрзнатини, но ништо сериозно.

„Се криеше под тераса со кучето. Ова девојче многу сака животни и постојано си игра со уличните кучиња. По училиште отишла да ги нахрани, кога ја зафатиле силните ветришта од бурата“, вели една од полицајките кои биле дел од истрагата.

Откако била најдена, Вика била однесена во болница, а истиот ден била пуштена и дома. Сега, таа и мајка ѝ планираат да го вдомат кучето ако успеат да го најдат.

Оваа приказна со среќен крај е само уште еден доказ дека кучињата навистина се најдобриот пријател на човекот.

Спирова С. | Црнобело