Што сè ќе се промени во Англија по смртта на кралицата Елизабета, освен титулите на членовите на кралското семејство?

Детали

петок, 09 септември 2022

Покрај промените на титулите на членовите на кралското семејство, во Англија ќе се промени изгледот на парите и поштенските марки, како и стиховите од химната кои се однесуваат на кралицата Елизабета.

По смртта на кралицата Елизабета, нејзиниот син Чарлс стана новиот крал на Англија. Но, тој не е единствениот член од кралското семејство чија титула ќе се промени...

А, покрај промените на титулите, во Англија ќе има промени на поштенските марки, банкнотите и монетите, па дури и химната.

Што сè ќе се промени во Англија по смртта на кралицата Елизабета?

Како што веќе спомнавме Чарлс ја доби титулата крал. Покрај него, со благослов од Елизабета, Камила стана кралица консорт, или кралица придружничка/сопруга – титула што ја носи сопругата на кралот.

Најстариот син на Чарлс, Вилијам, кој ќе го наследи тронот по неговата смрт, ја доби титулата војвода од Корнвол. Кејт Мидлтон, пак, сега е војвотка од Корнвол.

Сепак, најверојатно титулата на Вилијам наскоро ќе биде променета уште еднаш – тој ќе биде познат како принцот од Велс, титула што ја имаше Чарлс пред да стане крал.

Чарлс ја доби титулата во 1958 година.

Доколку Вилијам стане принцот од Велс, тогаш Кејт ќе биде принцезата од Велс – титула што ја носеше Дијана додека беше во брак со Чарлс.

Иако и Камила ја имаше титулата принцезата од Велс, одбиваше да ја користи поради Дијана.

И децата на Вилијам и Кејт ќе добијат нови титули – Џорџ и Луи се принцови од Корнвол и Кембриџ, а Шарлот е принцеза од Корнвол и Кембриџ.

Кога татко им ќе ја добие титулата принц од Велс, тие ќе станат принцови и принцеза од Велс.

Истовремено, и децата на Меган и Хари ги имаат титулите принц и принцеза.

Сепак, постојат контроверзии околу нивните титули поради заладениот однос на Меган и Хари со кралското семејство.

Постојат гласини дека сега, кога е крал, Чарлс ќе проба да им ги одземе титулите, но дотогаш тие се принц и принцеза.

Покрај титулите на членовите на кралското семејство, сега во Англија ќе се променат и други ситници.

Најпрво ќе се направи промена на банкнотите и монетите – наместо кралицата Елизабета, на нив ќе го има лицето на кралот Чарлс.

Сепак, оваа промена нема да се случи преку ноќ. Најверојатно ќе поминат неколку години додека да се направат новите пари, да се пуштат во употреба и додека парите со ликот на Елизабета постепено да се исфрлат од употреба.

Покрај тоа, допрва треба да се дизајнира изгледот на новите монети и банкноти.

Ќе има промена и во изгледот на поштенските марки кои сега ќе се изработуваат со ликот на Чарлс.

Истовремено, ќе треба да се промени и химната на Англија – во химната има стих God save our gracious Queen (Боже спаси ја нашата милостива кралица).

Овој стих ќе се промени во God save our gracious King (Боже спаси го нашиот милостив крал).

Ќе треба да се направат и промени во воените медали, но и полициските и воените униформи кои досега го носеа печатот на кралицата Елизабета.

До смртта на Елизабета, пасошите во Англија беа издавани во нејзино име, што значи сега ќе се промени и ова.

Исто така, и Чарлс ќе треба да го промени неговиот официјален потпис. Досега тој се потпишуваше само како Чарлс, но сега ќе мора да ја додаде и буквата R (од латинскиот збор за крал – Rex).

Спирова С. | Црнобело