Маж ги изгубил рацете и останал парализиран од струен удар на 11 години – сега е бодибилдер: „Болката ме направи посилен“

Детали

недела, 09 октомври 2022

„Викав на цел глас и пробав да си го фатам левиот зглоб со десната рака, но ми се залепија. Прстите ми се стопија на зглобот и ми изгореа рацете од дланките до лактите. Помнам само болка, чад и некоја сина светлина“, раскажува 50-годишниот Шахид за струјниот удар поради кој останал без раце. Денес тој е бодибилдер и сака да ги инспирира другите во негова положба.

Шахид Икбал е 50-годишен бодибилдер кој има освоено и неколку награди за бодибилдинг, но најимпресивниот детаљ за него е тоа што нема раце и не може да ги движи нозете.

Шахид ги загубил рацете кога имал само 11 години од електричен удар кој речиси го убил.

Во 1983 година Шахид решил да се качи на бандера, додека неговиот брат го гледал. За жал, тогаш 11-годишноит Шахид го фатила струја со напон од 27.000 волти.

„Почувствував болка во рамото каква што не можете да замислите. Викав на цел глас и пробав да си го фатам левиот зглоб со десната рака, но ми се залепија еден за друг. Прстите ми се стопија на зглобот и ми изгореа рацете од дланките до лактите.

Помнам само болка, чад и некоја сина светлина. Се сеќавам дека паднав и можеби да видам како брат ми ме гледа беспомошно. Се разбудив една недела подоцна во болница во Лондон. Беше многу болно“.

Шахид едвај ја преживеал несреќата и поминал две години „влечејќи“ се по болници, а му биле направени три операции.

Првата операција траела над шест часа бидејќи хирурзите морале внимателно да го отстранат целото изгорено ткиво.

„По операцијата добив гангрена во мојата рака и лекарите мораа да ја ампутираат целата. Татко ги молеше да ми ја спасат раката. Тоа беше мрачен период за мене. Постојано ми требаше помош од некој“.

Неговите раце биле ампутирани, а бидејќи си го скршил ’рбетот од падот, сега не може да оди.

Со текот на времето Шахид закрепнал и успеал да заврши факултет, па станал графички дизајнер.

„Луѓето секогаш ме потценуваа поради мојата парализа. На училиште и факултет ми беше тешко бидејќи сите зјапаа во мене. Ми се смееја. Или мислеа дека сум одвратен, или ме сожалуваа“.

Во 2015 година на Шахид му биле направени специјални тегови, па ова му дало можност да вежба.

Со текот на времето Шахид успеал да стане бодибилдер, па дури и да се натпреварува.

„Напорно тренирам веќе седум години. Од срамежливо момче, се претворив во возрасен маж. Мислам дека со годините се подмладувам“.

„Ги мотивирам луѓето со мојот оптимизам. Инспирирани се бидејќи јас сум секогаш среќен, без разлика што се случува“.

Покрај вежбањето во теретана, Шах оди на пливање, а користи и терапија со електрична стимулација на мускулите на нозете.

„Ги немам употребено нозете 38 години, но имаат здрава мускулна маса. Јас не сум посебна личност, но сум благословен и благодарен.

Инвалидитетот и попреченоста не треба да се гледаат со презир, туку да се прифатат. И ние што ги имаме сме луѓе“.

Спирова С. | Црнобело