Мајка го носи бебето на пазар во ќеса – приказната зад хит фотката од 80-ите за маките на модерните жени

Детали

вторник, 10 јануари 2023

Бебето било ставено во ќеса на шега, а целта им била да покажат како изгледа секојдневието на модерните жени – oткриена приказната зад хит фотографијата од 1987-ма година.

Во последните неколку години мајките постојано се информираат за растењето на децата по социјалните мрежи и на интернет форуми, а во советите не се изоставени понудите за средства за транспорт и правилен развој.

Од ергономски кенгури, марами, до најразлични седишта со повеќе положби за седење, држење, носење, постојано сме преплавени со информации, па се чини дека постојано на нешто мора да пазиме.

Така воопшто не е чудно што оваа фотографија исплива на социјалните мрежи по 33 години и веднаш стана вистински хит кај родителите кои се прашуваат „дали е возможно некој вака да ги носел своите деца?“.

Оваа стара фотографија е од унгарски пазар, а на неа се гледа мајката што го носи своето дете во пластична ќеса за пазарење.

Откако фотката стана вистински хит на социјалните мрежи, унгарските медиуми се обидоа да откријат кој стои зад неа, како и кои се ликовите на фотографијата.

Фотографијата е дело на унгарскиот фотограф Атила Манек, кој во 1987-ма година ги сликал неговата сопруга и ќерка во Будимпешта, а целта му била со ова уметничко дело да ја покаже положбата на жената во унгарското општество во тоа време.

Атила сакал да ја покаже тежината на „втората смена“ што ја работат жените, затоа што тие ги земаат децата дома по работа и најчесто треба да одат и да пазарат, па на шега, ќерка им Енико ја ставиле во ќесата за пазарење.

Со оваа фотографија Манек победил на натпревар за најдобра фотографија, а вели дека ниту сам не знае како таа се нашла на интернет цели 33-години подоцна.

Но по огромниот интерес што фотографијата го предизвика на социјалните мрежи, Атила одлучи да објави нови фотографии и да покаже како изгледаат неговата сопруга и ќерка денес.

Б. С. Б. | Црнобело