„Имам алопеција од бебе, на 6 години ја избричив главата, а на 14 ги изгубив веѓите и трепките, но сега се сакам“

Детали

петок, 13 јануари 2023

„На 6 години откако ми останаа само неколку прамени на главата, се избричив целосно. На 14 ги изгубив веѓите и трепките. Денес сум самоуверена и сметам дека сум убава. Имам и прекрасна љубовна врска со човек кој ме сака и без перика“, споделува девојка од Англија.

Даниел Гилберт (24) од Англија страда од алопеција уште од бебе, а со години имала проблеми со самодовербата поради тоа.

Таа на својот Инстаграм профил постојано споделува видеа од своите трансформации, откако ќе се нашминка, ќе залепи трепки и ќе стави перика.

Нејзината исповед:

„Имав коса до 18-месечна возраст. Но, тогаш мајка ми забележала ќелави делови и ме однела на доктор. Ѝ било кажано дека станува збор за бебешка алопеција и дека косата ќе ми порасне повторно.

Но, не беше така и на 2-годишна возраст официјално ми беше дијагностицирана алопеција.

Како дете ми се појавуваа и други ќелави делови, и на 6 години кога ми останаа само неколку прамени коса одлучив да ја избричам главата.

Родителите ми беа огромна поддршка и се чувствував кул.

До 15 години ги изгубив и сите влакна на телото, а на 14 години веѓите и трепките.

Дотогаш добро се справував со ситуацијата, но тогаш како да го изгубив својот идентитет. До факултетските денови самодовербата ми беше уништена и тешко стекнував и пријатели. Се изолирав и дозволував алопецијата да ми го уништи животот.

Но, потоа почнав да експериментирам со шминката и станав посамоуверена.

Снимам видеа за да ја поткренам свеста за алопецијата. Сега сум самоуверена и сметам дека сум убава.

Имам и прекрасна љубовна врска со човек кој ме сака и без перика.“

С. С. | Црнобело