„Бев на ќебапчиња во скопската чаршија и уживав: Зошто ова искуство не е само за туристите?“

Првиот пролетен викенд оваа година, со убавото време и сонцето, ме измами на прошетка, прво низ градскиот парк, а потоа до Старата скопска чаршија каде што седнав на ќебапчиња. Одамна не сум била низ чаршијата, па си реков, зошто да не ја уживам како да сум турист?!

Викендов поминав едно поладне во Старата чаршија. Решив да се однесувам како турист и искуството им го препорачувам на сите.

Додека шетав низ уличките со калдрма и автентичен изглед, уживав во глетката – луѓето не брзаа никаде, застануваа покрај дуќаните, се загледуваа во излозите на продавниците во кои и денес живеат старите занаети.

Се израдував што чаршијата не го загубила духот. Едни пиеја турско кафе со локум, други црн чај, а трети ручаа во најпознатите ќебапчилници во срцето на чаршијата.

Додека шетавме со пријателите и размислувавме по која уличка да тргнеме, нè привлече глетката на луѓето што уживаат додека јадат, ама и мирисот на тазе печените ќебапи, па решивме да седнеме.

Имаше неколку слободни маси, покриени со црвено-бел кариран чаршаф. Ова само го дополнуваше чувството дека сме во некое друго време.

Порачавме точено пиво и по 10 ќебапи со лута пиперка и домашно лепче.

Пивото ни го донесоа во кригли од пред 30 и повеќе години, со стариот црвен знак на скопското пиво.

Потоа стигна и храната. Топла, убаво послужена и – вкусна.

Додека седевме, келнерите неколкупати нè прашаа дали е сè во ред, беа љубезни и, уште поважно, беа брзи.

А на масите покрај нас имаше повеќе туристи отколку локалци. Зборуваа на различни јазици и не криеја дека уживаат во ручекот. Јадеа и наздравуваа, исто како и ние.

Одејќи накај дома, сфатив дека Скопската чаршија не е искуство само за туристите, туку треба да е сврталиште и за локалното население.

И токму затоа на сите ви препорачувам едно попладне низ чаршијата, во духот на старото време, со топ храна и пиво во старински кригли. На здравје!

А. Ј. | Црнобело