За пријателот кој за еден живот одживеа како за три наредни и беше светлина која допре сечиј живот...

Тој не „земаше“ од животот, буквално грабаше од него и секогаш ќе ми речеше „Животот е за тебе, кај тебе сè е сонциња, пеперутки, цветчиња и делфинчиња, ти знаеш да ја гледаш убавата страна на постоењето“, а всушност и јас го мислев истото за него и претажно ми е што повеќе не е тука, но ме теши мислата што за свои 40, одживеа како за 140 години живот.

Една болна ситуација ме потсети на еден мој пријател.

Пријател кој за жал преживеа едвај 40, пријател кој го изгубивме прерано пред 4 години и кој нема да биде заборавен.

Тој се смееше најгласно, сакаше најсилно, од секоја негова пора блескаше неговата страст за животот.

Не земаше од животот, буквално грабаше од него и секогаш ќе ми речеше: „Животот е за тебе, кај тебе сè е сонциња, пеперутки, цветчиња и делфинчиња, ти знаеш да ја гледаш убавата страна на постоењето“.

И тоа секогаш ми беше најубавиот комплимент.

И јас го мислев истото за него и претажно ми е што повеќе не е тука, но ме теши мислата што за свои 40, одживеа како за 140 години живот.

Кај него сè беше интензивно, деновите беа долги, ноќите исполнети, а убавата енергија секогаш на највисоко можно ниво.

Тој делеше комплименти на некого, се спријателуваше со секого, за секого имаше убав збор.

Беше добар за сите, беше лекција како треба да се будите со насмевка и убава мисла.

Доживеа работи, кои други не би ги доживеале ниту за 3 наредни животи.

Беше интензивен, оставаше впечаток каде и да се појави и токму затоа нема да биде заборавен.

Беше поинаков, енергијата му беше инспиративна, беше лекција за сите што и малку се колебаа за убавината на животот или пак му ја потценуваа убавината на истиот.

Буквално животот беше за него, како што и тој самиот мене ми велеше дека животот е за мене.

И, за жал, ваквите луѓе некогаш најкратко живеат, но оставаат толку силен впечаток што не се забораваат.

Нивната светлина, посилна од сонцето, останува да свети или влијае врз сите други до чиј живот допрела и за многу, многу години од денот кога сме ги изгубиле.

Буквално среќни сме што воопшто сме ги имале!

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело