CRNOBELO лексикон со диџеј Галоски: „Мајка ми преживеа рак и нè одведе на прав пат - таа е мојот идол“

Детали

петок, 09 јануари 2026

„Познаници имам милион, а најдобри другари помалку од прсти на една рака. Е за нив се патува и за добро и лошо дури и на другата страна од светот“ - напиша Галоски во лексиконот на CRNOBELO.com.

Малкумина знаат дека диџеј Галоски се вика Александар - и јавноста и пријателите најчесто го викаат по презимето, кое со години му е и диџејско име.

Низ годините, Галоски создаде име за себе на светската сцена, настапувал во познати клубови на неколку континенти, неговата музика ја пуштаат Тиесто, Дејвид Гета, Мартин Герикс, Дипло, Стив Аоки и многу други.

Галоски со Тиесто

А, тој ни откри неколку интересни и непознати детали за себе и се потпиша во нашиот лексикон:

1. Како се викаш и дали имаш прекар?

Здраво здраво! Моето име е Александар Галоски, моментално сите ме викаат по моето диџејско име Галоски.

Како мал имав прекар, ме викаа Пилот (така ми беше и старото диџејско име како дете, кога имав 14 години).

2. Колку години имаш и што си во хороскоп?

Имам 34 години, роден сум на 28 февруари 1991 година - во хороскоп сум Риби.

3. Која ти е омилена песна? А пејач и пејачка?

Ух, ова е едно од потешките прашања затоа што имам многу омилени песни, ама една која ми е врежана во глава Alesso Vs. OneRepublic - If I Lose Myself. 

Омилен пејач од домашната сцена секогаш Тоше Проески и ден денеска ечи во кола на полн глас.

4. А омилена книга?

Три се: IKIGAI – The Japanese Secret to a Long and Happy Life, „48 закони на моќта“ на Роберт Грин и исто интересна приказна и поврзаност имам со книгата „50-от закон“ на Роберт Грин.

Имаше период кога бев на раб да се откажам од диџејство и музика, тежок период од животот, а книгава ме врати на „фабричко подесување“.

5. Омилен глумец, глумица, филм, серија?

Џони Деп, Даниел Крег (aka Џејмс Бонд), Џејсон Стејтам - фраери на макс.

Омилена глумица ми е Пенелопе Круз.

Филм сите серијали на Џејмс Бонд со Даниел Крег.

Oмилени серии ми се Peaky Blinders и Spycraft.

6. Имаш ли омилен спорт, клуб, спортист? За кого навиваш?

Тренирав фудбал како мал, така што фудбал од спорт.

Омилени екипи како дете ми беа Милан и Арсенал, а сега не ни пратам, не знам кој игра за нив.

Омилени спортисти Кристијано Роналдо, Новак Ѓоковиќ и херојот од детството и мое другарче - нашиот одбојкар Јовица Симовски.

7. Имаш ли милениче? Како се вика?

Имам три кученица. Луна и Симба се двете хаски, и Балтик. Е тој е јазовичар и најнемирниот и најсмешниот дома.

8. Кој ти е среќен број?

Седум.

9. Што сакаше да бидеш кога ќе пораснеш?

Пилот, така и ми беше прекарот.

10. Кој ти е омилениот пијалак? А храна?

Омилена пијачка – водка (чиста без лимон, само коцка мраз).

Од храна суши, рамен, шпагети и пица.

11. Кој ти е најдобар другар/ка? Колку долго се дружите?

Познаници имам милион, а најдобри другари помалку од прсти на една рака - да не ги именувам да не се налутат другите, ха, ха.

Ама за овие што го имаат статусот најдобри другари се патува за добро и лошо на другата страна од светот.

12. Каков ученик беше? Кој ти беше омилен предмет?

Бев многу добар и одличен ученик. Омилен предмет ми беше географија.

13. Кој ти е идол (а да не е позната личност)?

Мајка ми дефинитивно, жената преживеа неколку битки со рак и хемотерапии и покрај сите тие битки нè изгледа и извади на прав пат - херој за овој и сите идни животи.

Продолжува на следната страница...