Леле оној неамбициозен, онаа само на шетање мисли - „Кадијо“, пронајди ја среќата во себе и имај свој живот

„Кадијо, што судиш за туѓите живот! Денес здравата психа е благослов од Бога. И мора да научиш да се „наштелуваш“ така... Да се научиш да го гледаш доброто во луѓето, во ситуациите, во работата и така нема да бидеш вечно огорчен и незадоволен, туку во сè околу себе ќе гледаш убавина и ти ќе бидеш среќен човек!“

Леле, оној неамбициозен нема никакви апетити за кариерата, леле, онаа само на шетање мисли и троши пари...

Леле, кадијо, да не си несреќен во врска со својот живот, да не станува збор за проекција - односно ја гледаш својата несреќа во другите?

Ти си незадоволен од својот живот! Ти си незадоволен од постигнатото, од фазата, од моменталните случувања.

И пред да продолжам, да ти кажам - „Ќе бидеш добро, не грижи се!“

Но, време е да си признаеш: „Јас сум незадоволен / тажен / несигурен“...

Престани да мислиш: „Тие се проблемот... Другите се несреќни / лоши / неправедни / никакви“.

Тие се совршено среќни со начинот на кој одбрале да го живеат својот живот и навистина не е твое да судиш.

Реално, дури можеш и да учиш од нив како може да се биде среќен и со малку.

Јас не велам да не си амбициозен, само те потсетувам во трката за големи идни успеси, да не заборавиш да уживаш во тоа што го имаш денес.

А имаш многу!

Имаш за што да бидеш благодарен секое утро. Прво и најважно – ти си здрав човек и за тебе само небото е граница!

Граби, освојувај, расти... Но, на патот до тоа не потценувај, омаловажувај и осудувај.

Секој си има своја замисла за среќа, секој си има свој концепт за тоа што значи среќен живот.

И тоа што за нив преставува среќа, за тебе можеби е несфатливо, но верувај дека е и обратно.

Денес здравата психа е благослов од Бога. И мора да научиш да се „наштелуваш“ – баш така!

Да се научиш да го гледаш доброто во луѓето, во ситуациите, во работата, во секојдневието и така нема да бидеш вечно огорчен и незадоволен, туку во сè околу себе ќе гледаш убавина и ти ќе бидеш среќен човек!

Така е, толку лесно е! Среќата е во тебе.

Тебе не ти требаат не знам какви изреализирани соништа за да доживееш среќа. Тебе ти треба здрава психа, силен карактер и срце полно благодарност за тоа што го имаш.

Кога ќе стигнеш до тоа ниво, потоа за тебе само небото е граница!

И понекогаш верувај поважно е да си среќен, отколку совршен во туѓи очи. Најважно е да живееш совршен живот, но според твоите критериуми за истиот.

Ако не успееш во ова, дури и еден ден, со сите изреализирани соништа, ти повторно ќе бидеш несреќен човек.

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com