Брат, плачат ли бе маживе во Македонија?

Порано брат, цврст како карпа. А бе мене ништо не ме допирало.

Не дека не сум се грижел, не дека не ми било тешко, ама мене солза да ми видиш немало, може на 6 години последен пат кога го рокнав коленото и ми кажаа: „Фудбал – јок во животот“.

Сега? Сега, брат јас сум ти дождовна година.

Сега, ист татко ми.

И тој беше карпа цел живот ама кога ѝ се наближи на 70-тата, а бе почна да заплакува и за тоа што пилето паднало од гранчето.

И се чудев јас. Како ваква промена? Од човек карпа, сега треба да го тешам. Липа дури на моменти, гледам и се чудам.

И мене ми дојде ова 3 децении порано од него.

Е убаво викаат, не се чуди или смеј, ќе те стигне.

И ме стигна!

Вчера слушав за туѓа судбина, за туѓа трагедија. И држев, држев, држев. Ама дома сум се исплакал како мало дете.

Не, една скришна солза брат, а бе си течат, река. И не можам да прекинам.

И зошто, како, нефер, животче што ти е, како е можно, денес постои сè за што веруваш дека ти е загарантирано, утре само пепел.

Само пепел брат и болни сеќавања.

И си плачам, срце ме стега и сум станал емпатичен до ниво на сосеткана од 3-ти што ја слушам како липа на турски серии, кога ќе ја остави вратата од балкон отворена.

И за првпат во живот чувствувам и бес и слабост и немоќ и сите негативни емоции натоварени на мене за судбина што не е моја. Но, за судбина што така силно ме погоди, што жена ми почна да вика по мене – Ало, собери се!

И ќе се соберам брат, ама веќе не сум карпата што бев некогаш, некако немам имунитет на туѓа болка.

Ме болат туѓите маки.

Пи*ка ли станав брат или добро е човек да чувствува, сочувствува и да си oлесни.

А бе брат, плачат ли маживе во Македонија? 

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

Брат | Црнобело