Поучна приказна како сами си ги креираме рајот и пеколот

Дали понекогаш се прашувате како некои луѓе не ја тргаат насмевката од лицата? Изгледа сами го креираат својот рај...

Еднаш еден човек пристигнал кај Господ. Сакал да дознае некои работи од него, меѓу кои и тоа како изгледаат рајот и пеколот.

Господ се согласил да му покаже, па го фатил за раката и го одвел пред две врати.

Ја отворил едната.

Имало огромна маса со чинија на средината. Чинијата била полна со храна која мирисала толку вкусно, што човекот ја голтал храната со очите.

Околу седеле луѓе, но изгледале беспомошни, болни и умирале од глад. На раката од секој била прицврстена лажица со многу долга дршка. Луѓето лесно фаќале од храната, но не можеле да ја донесат до устата затоа што дршката им била предолга.

Нивната несреќа го наежила човекот.

„Сега го виде пеколот“, му рекол Бог.

Потоа ја отвориле втората врата.

И таму имало иста голема кружна маса со чинија со превкусна храна. Дури и луѓето во раце исто така држеле лажици со предолги дршки. Но, сите изгледале сити и среќни.

„Не разбирам“, рекол човекот.

„Тоа е едноставно“, му рекол Господ.

„Овие луѓе научиле да се хранат еден со друг, додека другите мислат само на себе. Рајот и пеколот се исти. Разликата е во нас.“

Извор