Интересни факти за близнаците: Последните децении е зголемен бројот, високите жени почесто ги раѓаат

Еднојајчаните близнаци имаат исти гени, но нивните личности се различни, дури и кога се воспитувани на ист начин.

Истражувачот Тим Спектор верува дека различната експресија на гените е последица на факторот околина.

Неколку интересни факти за еднојајчените близнаци:

Ако оплодената клетка се подели во подоцен стадиум од ембрионалниот развој, отколку што е вообичаено, резултатот се близнаци кои се симетрични. Некои од нивните телесни карактеристики обично се спротивно ориентирани, на пример едниот близнак е десничар, а другиот левичар.

Близнаците обично создаваат сопствен јазик кој е неразбирлив за другите. Едно истражување објавено од Институтот за општа лингвистика, покажува дека автономните јазици постојат кај 40% од близнаците, иако тие не го паметат јазикот цел живот. Јазикот обично се состои од некои измислени зборови, неколку различни изрази и варира со возраста. Феноменот не е ограничен само на близнаците и може да се забележи кај обичните браќа и сестри.

Иако некои бразди на врвот на прстот се слични, близнаците се разликуваат по детали, покажало едно истражување.

Бројот на близнаци последниве децении е зголемен

Бројот на близнаци е најголем до сега, покажало истражувањето на Националниот центар за здравствена статистика. Бројот на раѓање на близнаци е зголемен за 76% од 1980 до 2009 година. Пресудни за ова се методите за лечење на неплодност. Исто така, жените кои се постари од 30 години почесто раѓаат близнаци.

Иако луѓето тешко ги разликуваат еднојајчаните близнаци, тоа не е случај кај кучињата. На пример, германските овчари кои се посебно обучени, можат да забележат варијации во мирисот кај еднојајчаните близнаци.

Тоа важи и во случаи кога близнаците живеат во иста куќа и јадат иста храна. Кучињата кои се користени во студијата биле тренирани од полицијата, посебно обучени да разликуваат нијанси во мирисот.

Истражувањето е спроведено на близнаци постари од пет години, па не е познато дали кучињата можат да разликуваат мирис и кај бебиња.

Високите жени почесто раѓаат близнаци

Акушерите ги споредиле по висина жените кои раѓале близнаци и тројки, со просечна висина на жените во Америка и откриле дека високите жени почесто раѓаат близнаци.

Истражувањето било објавено во списанието за репродуктивна медицина. Научниците сметаат дека причината за ова лежи во хормонскиот фактор сличен на инсулин кој е поврзан со веројатноста за раѓање близнаци и со висината на телото.

Н. Т. | Црнобело