Имал неуспешен обид за самоубиство, една негова слика вреди над 110 милиони долари – Факти за Клод Моне

Се обидел да се самоубие затоа што француската академија на уметностите не ја прифаќала неговата уметност, морал да си замине од семејниот дом за да може да се посвети на уметноста, а денес неговите слики вредат милиони. Кој бил Клод Моне, таткото на импресионизмот?

Оскар Клод Моне е почитуван уметник поради неговата серија на слики од преубави градини, јапонски мостови и цвеќиња. Францускиот уметник знаел како перфектно да манипулира со светлото и со сенките за да го прикаже пејзажот на револуционерен начин.

Неговата слика „Стогови“ во 2019-та година беше продадена на аукција по цена од 110, 7 милиони долари, а исто така голем број од неговите дела денес се продаваат за милионски суми.

Неколку факти кои веројатно не ги знаете за таткото на францускиот импресионизам:

Од мали нозе се гледало дека е талентиран

Моне бил роден во Париз во 1840 година. Тој почнал да црта уште кога бил многу мал, а најчесто ги цртал неговите соседи и учители.

Тој учел во уметничко училиште, а како млад тинејџер продавал карикатури кои сам ги изработувал од локални личности.

Тој најчесто цртал надвор од домот, а подоцна ќе стане познат токму по неговите пејзажи.

Неговата мајка го поддржувала во уметничките амбиции, но татко му сакал Клод да се вклучи во семејниот бизнис.

Кога мајка му починала во 1857-ма година, Моне го напуштил домот, се преселил кај неговата тетка и продолжил да студира уметност против желбите на неговиот татко.

Требало да служи 7 години воен рок

Во 1861-ва година, Моне морал да се приклучи на војската и да отслужи задолжителен воен рок, кој тогаш изнесувал 7 години.

Тој го напуштил Париз и заминал во Алжир, територија која бил под контрола на Франција.

Татко му се понудил да плати за да може тој да го напушти служењето во војска, меѓутоа само под услов ако се откаже од уметноста, но Моне не се согласил.

По една година служење од сите седум кои требало да ги отслужи, тој сериозно се разболел.

Неговата тетка платила за тој да биде ослободен и повторно го запишала во уметничко училиште. 

Бил толку исфрустриран од животот што се фрлил во реката Сена

Во неговите доцни 20-ти години, Моне бил многу исфрустриран од Француската академија за уметност.

Тој мразел да креира уметност по формула, нешто што изгледа како копија на сѐ што веќе било изложено во Лувр.

Иако пробувал неговите дела да влезат во изложбите на Академијата, речиси секогаш бил одбиван.

Така паднал во депресија, не можел веќе финансиски да го издржува неговото семејство па се фрлил од мост во реката Сена.

Меѓутоа го преживеал падот и почнал да поминува повеќе време со уметници кои исто така се спротивставувале на Академијата.

Тој помогнал да се создаде правецот Импресионизам

Моне заедно со други тогаш не толку познати уметници создале здружение и самите направиле своја изложба во 1874-та година.

На изложбата имало прекрасни дела со светли и убави бои кои изгледале како некој спонтано да си играл со четката.

Откако еден критичар го споредил делото на Моне со незавршена скица или импресија, терминот „импресионист“ почнал да ги опишува уметниците кои имаат радикални нови идеи за сликање.

Водните лијани во неговата градина ги увезувал од секаде од светот 

Од 1883-та до неговата смрт во 1926-та година, Моне живеел во Живерни, село во северна Франција.

Низ годините во неговата градина, градинарите одгледувале сѐ, од афион до јаболкови дрвја и создавале прекрасна слика која уметникот подоцна ја преточувал во неговите дела.

Кога почнал сериозно да заработува од неговите продажби, тој почнал многу да инвестира во неговата градина.

Почнал да ги увезува водните лилјани од Египет, Јужна Америка и многу други места од светот.

Општината многупати му забранила да сади странски растенија од страв дека ќе ја загади водата но тој не слушал.

Во последните 25 години од неговиот живот тој најчесто ги сликал водните лилјани во секакви светлини и текстури.

Туристите можат да го посетат неговиот дом и неговата градина

Во 1926-та година, Моне починал од рак на градите. Од 1980-та година неговиот дом во Живерни бил отворен за посета. Туристите можат да ги видат неговите прекрасни цвеќиња и градина.

Секоја година стотици туристи шетаат низ познатата градина и домот на познатиот уметник. Освен градината, туристите можат да видат повеќе соби од домот на Моне вклучувајќи ја и познатата сина соба.

А.В. | Црнобело