Како учтиво да ја вратите нарачката во ресторан (и кога не е во ред да барате нов оброк)?

Доколку ви ја згрешат нарачката или ви стават состојка која сте нагласиле дека не ја сакате, во ред е да ја вратите храната во ресторан. Но, како да го направите тоа без да ги навредите келнерите или, пак, готвачот?

Сите правиме грешки, па нормално е некогаш да ви се случи да ви ја згрешат нарачката во ресторан.

Истовремено, сосема нормално е и оброкот што сте го добиле да не ви се допаѓа, па да сакате да го замените.

Но, проблемот е што во ваквите ситуации сите сме загрижени дека ќе делуваме неучтиво, па дури и дека ќе ги навредиме келнерите или готвачите.

Aко почитувате неколку едноставни правила, не би требало да имате проблеми.

Кога е во ред да ја вратите храната?

Постои граница помеѓу тоа навистина да имате проблем со храната или само да барате изговор да ви донесат нешто ново.

Ситуации во кои е во ред да ја вратите храната:

• Сте добиле ладна храна, а сте порачале топол оброк.
• Храната не ви изгледа дека е целосно зготвена – месото ви се чини живо, зеленчукот не е обарен доволно…
• Сте побарале нешто конкретно, како да не ви ставаат домати, но сепак ви ставиле.
• Навистина, воопшто не ви се допаѓа храната и не можете да ја јадете.

Како учтиво да ја вратите нарачката?

Веднаш реагирајте

Штом ќе забележите дека има потреба да ја вратите храната, веднаш известете го келнерот. На овој начин, ако сте во друштво, другите ќе нема потреба да ве чекаат премногу додека да ви ја сменат нарачката.

Бидете учтиви

Без разлика поради што ја враќате храната, секогаш треба да бидете учтиви кон вработените во ресторанот.

Извинете се, кажете зошто сакате да ја вратите храната и, на крај, заблагодарете се.

Бидете трпеливи

Додека ја чекате новата нарачка, бидете трпеливи и немојте по стопати да прашувате до каде ви е храната.

Подготовката на нов оброк одзема време.

Кога не е во ред да ја вратите храната?

Не е во ред да ја враќате храната откако сте изеле половина.

Ако сте изеле повеќе и дури тогаш ви текне дека не ви се допаѓа, покажувате непочитување и, генерално, лошо однесување.

Доколку имало реална потреба да го вратите оброкот, сигурно немало да изедете половина.

Спирова С. | Црнобело