Македонците најмлади стапуваат во брак на Балканот - во кои земји се чека најдолго?

Според податоци на Евростат од 2021 година, во просек, Македонките стапуваат во брак на 26-годишна возраст, а мажите – на 29 години.

Дали сте во брак? Ако да, на која возраст се венчавте – дали можеби во раните 20-ти или, пак, по 30-тиот роденден?

Според Евростат, Македонците се меѓу народите од Европа кои најрано стапуваат во брак, а ова важи и за двата пола.

Статистичките податоци од 2021 година покажуваат дека во просек, Македонките стапуваат во брак на 26-годишна возраст.

Мажите, од друга страна, чекаат малку подолго, односно, во просек, првпат стапуваат во брак на 29-годишна возраст.

Во околните земји, мажите во Бугарија чекаат до 31-иот роденден, а жените – до 28-иот.

Мажите во Хрватска првпат стапуваат во брак на 31-годишна возраст, додека жените – 28-годишна возраст.

И мажите во Србија првпат се венчаат на 31-годишна возраст и жените на 28-годишна возраст.

За Албанија нема податоци, додека мажите во Грција првпат се венчаат на 32-годишна возраст, а жените на 30-годишна возраст.

Во Црна Гора, жените во просек се венчаат на 27 години, а мажите на 31 година.

Ова значи дека во просек, во регионот, Македонците и Македонките најрано стапуваат во брак.

Податоците на Евростат покажуваат дека најдолго чекаат мажите во Шпанија, Шведска и Франција, односно првпат стапуваат во брак на 36-годишна возраст.

Во истите држави, и жените чекаат најмногу, односно до 34-иот роденден.

Ако се земат предвид податоци од 2020 и 2019 година, државите во кои жените најрано стапуваат во брак се Украина (24 години), Белорусија (25 години) и Турција (25 години).

И мажите во овие три држави во просек најрано стапуваат во брак – во Белорусија на 27 години, а во Турција и Украина на 28 години.

Спирова С. | Црнобело

фото: depositphotos.com