Ги откопуваат мртвите за да ги избањаат и да им ја сменат облеката – Бизарна церемонија на народ во Индонезија

Секој август, луѓето од народ во Индонезија ги откопуваат телата на нивните починати, ги чистат и им ја менуваат облеката, па ги враќаат во гробот. Тие веруваат дека нивните души уште патуваат кон задгробниот живот, па затоа треба да се грижат за нив и по смртта. Содржината во продолжение може некому да биде вознемирувачка...

Во Индонезија постои народ познат како Тораџа (анг. Toraja) кој има навистина несекојдневни обичаи и традиции.

А, една од најчудните е традицијата за нивните починати.

За нив, погребите се едни од најважните церемонии и колку побогата е личноста којашто починала, толку пораскошен и поскап е нејзиниот погреб.

Ако почине многу богата личност, погребот трае неколку дена и го посетуваат стотици луѓе.

Доколку станува збор за личност од посиромашно семејство, за погребот чекаат и по неколку месеци, додека да се соберат пари за церемонијата.

На крај, ковчегот се положува во пештера или во камена гробница.

Камената гробница се резбари во карпа, а овој процес може да потрае и неколку месеци.

Дотогаш, телото на починатиот се чува во градба позната како tongkonan.

За починатите, тие имаат и церемонија позната како Ma’nene, која може да се преведе како „грижа за предците“.

Церемонијата се одржува во август, а тогаш луѓето ги откопуваат своите починати и, на некој начин, се грижат за нив.

Секоја почината личност се откопува еднаш на четири години.

Додека трае церемонијата, семејството на починатата личност го чисти ковчегот. Истовремено, го чистат и трупот и му ја менуваат облеката.

А, го оставаат и извесен период на сонце бидејќи веруваат дека со тоа го забавуваат процесот на распаѓање.

Луѓето од овој народ не ја гледаат смртта како еден конечен настан, туку веруваат дека е постепен процес во кој душата на починатиот се движи кон задгробниот живот.

И, токму поради ова, сметаат дека треба да се грижат за телата на починатите – бидејќи, нивната душа сè уште патува.

Не е познато од каде точно потекнува церемниајта, но народот верува дека сè почнало со ловец кој живеел пред стотина години.

Според митот, тој нашол мртво тело во џунглата. И, бидејќи не сакал да го остави напуштено, за да му покаже почит, го облекол.

И, оттогаш го следела неизмерна среќа во текот на целиот живот.

Спирова С. | Црнобело