Сакал да му остави милијарди на својот градинар, па парите исчезнале: Каде е богатството на наследникот на Hermès?

Наследникот на Hermès, милијардерот Никола Пеш, нема деца, па поднел документи да го посвои својот градинар и нему да му остави половина од богатството. Но, во меѓувреме, акциите што ги поседувал во Hermès исчезнале, а со тоа и најголем дел од неговите пари.

Брендот Hermès е основан во далечната 1873 година и оттогаш се претвори во една од најмоќните компании во својата индустрија.

Денес вредноста на компанијата се проценува на 260 милијарди долари, додека семејството што ја има основано важи за едно од најбогатите во светот.

Основачот на луксузниот бренд е Тиери Ермес и до денес неговото семејство управува со најголем дел од компанијата.

Еден од наследниците на основачот е 82-годишниот Никола Пеш кој поседува најголем дел од акциите на Hermès и чие богатство се проценува на 12 милијарди долари.

Никола нема ни сопруга ни деца, па планираше дел од богатството да остави на неговиот градинар.

Но, по контроверзната одлука, голем дел од богатството од империјата Hermès исчезна.

Кои се причините за чудната одлука на милијардерот и што се случило со парите?

Никола Пеш се држи настрана од јавност и живее во Швајцарија.

Во 2023 година, се појавија гласини дека поднел документи за легално да го посвои неговиот градинар, со цел тој да стане наследник на неговото богатство.

Градинарот е всушност возрасен маж, кој има околу 50 години, а милијардерот сакал да му остави половина од парите, односно околу 6 милијарди долари.

За градинарот е познато дека потекнува од Мароко, како и дека има сопруга и две деца.

Но, не се знае во каков однос е со милијардерот, односно колку долго работи за него и колку се блиски.

Пред контроверзната одлука, милијардерот планирал да го остави богатството на неговата добротворна фондација Isocrates, којашто ја формира во 2011 година.

Па, раководителите на фондацијата се огласија, барајќи од милијардерот да не го прекршува договорот за наследството.

Најголем дел од парите на Никола се од акциите во Hermès, а според договорот, доколу не добие дете, овие акции треба да ги наследи фондацијата.

Но, додека фондацијата се жалеше, кон средината на 2024 година беше соопштено дека дел од богатството на милијардерот мистериозно исчезнало.

Она што исчезнало не се физички пари, туку акциите на милијардерот во Hermès, па поради ова било тешко да се лоцираат кај кого се.

Милијардерот ретко обрнувал внимание на неговите финансии, но кога решил да ја провери состојбата, сфатил дека на негово име нема ништо, освен неколку имоти и инвестиција во бизнис во Канада.

Па, бил убеден дека зад кражбата на акциите стои неговиот финансиски советник Ерик Фрејмонд.

Наводно, Никола „слепо“ му верувал на Ерик и му дозволувал да раководи со неговите финансии без никаков надзор.

Па, милијардерот се сомневал дека токму тој ги продал акциите без да го извести.

Никола го тужеше Ерик, но на судењето тој изјави дека милијардерот не е во состојба да води сметка за своите пари поради проблеми со менталното здравје.

Тој истакна и дека Никола купил дури 54 имоти за градинарот и неговата сопруга и ова бил доволен показател за неговата немарност со парите.

Ерик не беше обвинет поради недостаток од докази, додека милијардерот бил на лекар кој утврдил дека сепак е во добра психичка состојба.

Никола има братучеди и роднини кои поседуваат акции во Hermès, но значително помалку од него.

Па, исчезнатите акции на милијардерот му го влошија односот со целото семејство.

Засега уште не е познато каде се акциите на Никола, додека тој наводно уште пробува да го посвои својот градинар.

Веројатно милијардерот го чекаат уште многу правни предизвици додека вистината да излезе на виделина.

Спирова С. | Црнобело