Кардиналите се заколнуваат на молк, не смеат да користат телефон: Што се случува за време на таинствената конклава?

За време на конклавата, која во просек трае околу три дена, кардиналите спијат во соби со затемнети прозорци, им ја проверуваат храната за скриени пораки и не смеат да имаат никаков контакт со надворешниот свет.

На 7-ми мај започна изборот на нов папа, познат и како конклава.

Конклавата се одвива во најголема тајност и овој пат изборот ќе го прават 133 кардинали од разни земји од светот, а секој од нив може да биде избран за папа.

Изборот се одржува во Систинската капела во Ватикан и се очекува да трае подолго од еден ден. За да биде избран нов папа, треба да има освоено две третини од гласовите, па токму поради ова конклавите траат и по неколку дена.

Сепак, во помодерната историја, изборот се одвива релативно побрзо – од изминативе десет конклави, ниту една не траела повеќе од пет дена. Од Ватикан, пак, предвидуваат дека новиот, 267-ми папа, ќе биде избран за најмногу три дена.

Што точно се случува за време на конклавата и како одат подготовките?

Конклавата е најтаинствениот демократски процес во светот, а ова го кажува и нејзиното име – потекнува од латинскиот израз cum clave, што може да се преведе како „со клуч“ или „под клуч“.

Кардиналот што ќе биде избран за папа се смета за наследник на Свети Петар кој е нарекуван и првиот апостол, и ќе биде еден од најмоќните лидери во светот. Односно, ќе биде лидер на повеќе од 1,4 милијарди католици ширум светот.

Кардиналите кои можат да гласaат треба да бидат помлади од 80 години и интересно е што можат да гласаат за себе. Но, бидејќи им требаат две третини од гласовите, ова правило не предизвикува проблем.

Кардиналите кои можат да гласаат почнаа да доаѓаат во Ватикан веднаш по смртта на папата Франциск и од понеделникот (05.05) веќе сите се таму.

Тие престојуваат во Ватикан, во резиденцијата позната како „Домот Света Марта“, а нивните соби се детално проверени за уреди за прислушување и што било што може да ја загрози таинственоста на конклавата.

Дури и прозорците на собите на кардиналите се затемнети за никој да не може да ги шпионира.

И Систинската капела каде што се одвива гласањето е темелно проверена за уреди за прислушување.

Бидејќи конклавата трае и по неколку денови, во овој период, кардиналите не смеат да имаат никаков контакт со надворешниот свет.

Затоа, според некои извори, строго се контролираат и нивните оброци. Односно, не можат да јадат храна во која може да се скрие некаква порака, како пита.

Пред почетокот на конклавата, кардиналите ги предаваат и своите телефони и електронски уреди, а сите во Ватикан – од свештеници, до готвачи и хигиеничари – даваат заклетва за молчење. Ако некој ја прекрши заклетвата, засекогаш ќе биде избркан и исклучен од католичката црква.

Продолжува на следната страница...