7 бесмислени верувања кои ни се врежани во главата од деца, а не можеме да се ослободиме од нив

Новата облека се чува за посебни пригоди, скапите чинии се за гости, домашното е секогаш подобро од купеното - дали и вие сте растеле со овие фрази (и ви останале врежани во главата и до ден денес)?

Од некои навики и верувања кои ги имаме од детството тешко можеме да се ослободиме и кога ќе созрееме.

Вие знаете дека работите што ги правите се смешни, но и понатаму продолжувате да ги правите, а само затоа што „така треба“.

Кои бесмислени верувања сме ги прифатиле од деца и не ги менуваме „за жива глава“ ни денес?

Домашното е подобро од купеното

Ова верување се однесува најмногу на храната, без оглед дали станува збор за одгледување прехранбени производи дома или готвење храна.

Дали и вам ви велеле дека доматите одгледани во дворот се повкусни од оние купени на пазар или во маркет, а дека ниеден оброк во ресторан не може да го замени ручекот зготвен дома, во кујната на баба или мама?

Вистинска домаќинка не фрла работи

Ако се водите од овој совет, тогаш во вашиот плакар со облека и денес сигурно има фармерки од пред 5 години, маичка која ја носевте во тинејџерските години ама и сега ви е точна или алишта што ви е жал да ги фрлите.

Истото се однесува на ситници кои ги собирате, а никогаш не ги користите за ништо, туку фаќаат прашина; за чевли на кои „можеби ќе им се врати модата“; за последната преживеана шолја за кафе од сетот што некогаш сте го користеле, ама немате срце да се ослободите од неа.

Листата оди во недоглед.

Среќата зависи од вас (и може да се смени во секој момент)

Дали како деца верувавте дека ќе имате лоша среќа ако поминете под бандера во вид на буквата Л (лошо), а ќе бидете среќни ако поминете под бандера со буквата А (арно)?

Или дека ако црна мачка претрча пред вас ќе ви се случи нешто неубаво?

А дали мислевте дека ќе ве следи среќа ако се разбудите со мелодијата на некоја песна во главата и веднаш потоа ја слушнете истата песна на радио?

И дека ќе имате среќа ако на улица најдете метална паричка и ја земете?

Колку пати ви кажале дека среќата зависи од „знаците“ што ги гледате и дека треба да се потрудите да ги „наместите“ коцките во своја полза?

Најубавите работи се чуваат само за посебни пригоди

Дали вашата баба ги вадеше скапите порцелански чинии само кога славевте нешто дома?

Или мајка ви ве облекуваше во нови алишта само кога ве водеа на гости, бидејќи новото и скапото е само за специјални пригоди?

Можеби ова не го правите денес, но нивните зборови и постапки ви се останати во главата, па често помислувате на нив (кога ќе тргнете со новите патики на пазар, на пример).

Како ќе ја прославите Нова година, такви ќе ви бидат следните 12 месеци

За годината да биде плодна, со изобилие, весела, трпезата за дочекот на Нова година мораше да биде полна, облеката нова, музиката гласна, а лицата весели и насмеани.

Дали и денес се трудите да го правите истото, иако, веќе не верувате во работите што ви ги кажувале кога бевте дете?

Носете „среќни алишта“ кога ви треба позитивна енергија

Имате важен тест, испит, полагате за возачка, одите на интервју за работа или на прв состанок? Се знае - мора да ги облечете среќните алишта за работите да тргнат на добро.

И признајте, ова ви е толку врежано во мислите, што го правите и денес.

Само мрзливите луѓе имаат слободно време

Колку долго ви требаше да си го исфрлите ова од главата?

Ве учеле да бидете вреди, да помагате дома, куќата да е средена секогаш, облеката да ви е чиста и испеглана, и сè да биде „цакум-пакум“, зашто ако не е, тогаш тоа е одраз на недомаќинка и мрзлива личност.

А само мрзливите луѓе имаат слободно време, време за себе, време за гледање телевизија, за долго и лежерно излегување, за спиење доцна наутро.

За среќа, повеќето луѓе веќе не веруваат во ова.

А. Ј. | Црнобело