6 знаци дека трошите неконтролирано (и не знаете каде ви одат парите)

Секој ден купувате кафе наместо да си носите од дома, постојано купувате оброци како чиа пудинг и се жалите на цената наместо да направите од дома, сами поправате работи за да заштедите, а на крај дупло плаќате... Секојдневни навики заради кои трошите без да почувствувате каде ви одат парите. 

Сигурно понекогаш ви се случува да се подзамислите каде ви отишле голем дел од парите, а не сте имале некои големи и сериозни трошоци.

Реалноста е дека многу ситни трошоци кои ги правите во секојдневието, малку по малку влијаат на сметката.

Во продолжение издвојуваме навики и ситуации кои се знак дека трошите неконтролирано, а има начини да заштедите. 

Ако сте во ред со тоа и не ви пречи тогаш ова не се однесува на вас и прескокнете, но доколку ве мачи ова прашање, можеби ќе ви помогнат да сфатите што да промените.

Постојано купувате кафе за носење наместо да си направите дома

Не зборуваме за оние пати кога седнувате на кафе со пријателите, туку за кафе за носење додека одите накај работа или на пикник – можеби изгледа како мал трошок, но кога е секојдневен, па и по повеќепати, може да направи разлика.

Секојдневно купување оброци како чиа пудинг, кои може да ги направите и сами

Сосема е во ред понекогаш да си купите ако ви е мерак да пробате од некаде, ако немате време, ако спонтано одлучите или немате многу избор, но доколку е секојдневно и постојано си се жалите за цената, можеби е време да почнете да си правите дома, барем понекогаш.

Купувате работи само затоа што се на акција, а не ви требаат

Ви се случува ли на каса да ви кажат дека е нешто на акција, или дека ако купите 2 парчиња од некој производ 3-тиот е гратис, па веќе во следниот момент да ги ставате во вашата ќеса? Иако не ви требаат...

Време е да не паѓате на промоции, туку да го купувате само она што ви е потребно.

Сакате сè сами да направите наместо да викнете професионалец

Доколку сте вешти во нешто е сосема во ред, но доколку не се разбирате, понекогаш е залудно да направите поголем проблем, па потоа да треба да плаќате повторно за поправка, за нови материјали, па и за мајстор кој овој пат ќе си ја знае работата.

Сте слушнале дека сиромавиот дупло плаќа, нели? Понекогаш е подобро да ја процените вистински ситуацијата и од старт да повикате професионалец.

Постојано нарачување ручек со достава

И како и за сите други работи, нема ништо лошо во тоа. Но доколку е секојдневно, а ви пречи што трошите толку на тоа, сменете си ги навиките.

Можеби немате многу време за готвење, но може да искористите еден ден за да направите неколку оброци однапред кои соодветно ќе ги спакувате за наредните денови.

Купувате намирници по потреба, наместо да имате полн фрижидер постојано

Секогаш е подобра стратегија одеднаш да направите залихи за подолг период, да имате она што ви е секогаш потребно дома, за да имате спремни намирници за оброци и да не се изложувате на дополнителни купувања храна од надвор.

Дополнително, кога одите во продавница почесто за по неколку работи, завршувате почесто со плус производи кои не ви се потребни и си правите дополнителен трошок.

М. М. | Црнобело