Направи сам - Џем од јагоди

Се ближи лето, а тоа значи изобилство на свежо овошје и зеленчук. Едно од омилените летни овошја на многумина, сигурно се јагодите. Вкусни, слатки и ги сакаат и деца и возрасни.

Јагодите се одличен извор на витамин Ц кој е значаен за развој на коските, крвните садови и забите. Освен тоа помага во борба со алергии, астма и го зголемува телесниот одбранбен механизам против разните вируси и бактериски инфекции.

Јагодите исто така одлично делуваат и на системот за варење, го забрзуваат метаболизмот и му помагаат на телото во согорување на масти и разградување на штетни состојки.

Јагодите во себе содржат и витамин Б кој управува со растот и развојот на косата и ноктите, го подобрува тенот, а кожата ја прави нежна, сјајна и здрава.

Македонија е една од земјите во кои јагодите одлично успеваат, па многу домаќинства подготвуваат џем од јагоди. Ако и вие сакате секогаш да имате вкусен намаз за палачинки или тазе кифлички, еве неколку совети како да направите.

Најпрво јагодите се мијат темелно и им се отстрануваат рачките. Потоа, поголемите јаготки се сечат на крупни парчиња, а малите се оставаат цели. Џемот се прави од големи парчиња овошје.

Потоа, потребно е да ги зашеќерите по желба (но, сепак јагодите впиваат доста шеќер) и да ги оставите една ноќ во ладилникот.

Вториот ден, откако јагодите го впиле шеќерот пуштиле свој природен сок, подготвени се за варење. Додека се варат, постојано треба да ги мешате и да ја отстранувате пената која се собира на врвот.

Варењето трае најмалку еден час, а откако ќе се сварат во џемот се додава ванила, чоколадо или други состојки по ваш вкус. Џемот се складира во тегли додека е топол, но неопходно е теглите да бидат претходно загреани во рерна на 100 степени.

Теглите добро се затвораат, а можат да се отворат во наредните шест месеци до година дена, ако во џемот нема некоја состојка која има пократок рок на траење.

А сега можете да почнете да правите колачи, палачинки, кроасани...

Добар апетит!