Искористете ги креативно празните кутии од чевли

Непотребното собирање на кутии од чевли конечно може да се исплати. Наместо да се мислите што да направите со нив и каде да ги сместите, ние ви нудиме мала помош.

Наједноставно би било ако ги претворите во уникатно обоени и декорирани ѕидни полички. Се разбира, нема да држат многу тежина, но сепак изгледаат поубаво отколку може да си замислите. Плус, имате уште еден изговор зошто купувате нов пар на чевли.

Следете ги следните неколку чекори и направете ефтина, а уникатна ѕидна полица.

Потребно ви е:

- Неколку кутии од чевли, големината и длабочината не се важни

- Спреј за боење

- Декоративна хартија

- Ножици

- Лепак

- Шрафцигер и неколку шрафчиња

Започнете со тоа што кутијата ќе ја обоите со спреј. Потоа обложете го дното со декоративна хартија во поразлична боја и добро залепете. Најдобро е да користите лепак во облик на стик.

Закачете ги кутиите вертикално, како на фотографиите за да добиете интересен мозаик. Зацврснете ги со шрафчиња во горниот и долниот дел, за поголема стабилност.

Изложете ги вашите омилени сувенири и создадете впечатлива и незаменлива ѕидна декорација.