Како правилно да ја спакувате зимската облека?

Иако календарската зима сè уште трае, високите температури веќе одамна ни пристигнаа. Заедно со нив, сигурни сме дека веќе ги распакувавте полесните маички и отворени обувки.

Но, сега на ред доаѓа зимската гардероба која треба да одмора уште најмалку 6 месеци.

Еве како чисто и уредно да ги спакувате омилените џемпери, палта и чизми:

- Задолжително исчистете ја облеката пред пакувањето. Во спротивно, мирисот на неа ќе ги привлече молците и постои голема шанса боите да избледат.

- Тешките палта проветрете ги неколку дена. Доколку можете, однесете ги на хемиско чистење. Ставете ги во навлака од мушама или кеса и закачете ги во гардероберот. Во никој случај не го туткајте или диплете палтото ако сакате да го носите и следната зима.

- Модните додатоци како ракавици, шалови и капи сместете ги во посебни кутии. Проветрете ги и нив неколку часа пред да ја затворите кутијата.

- Кога се работи за чевли и чизми, добро е да ги исчистите нивните ѓонови, а доколку се работи за чиста кожа, овозможете им целосна нега. Вратете ги во кутии малку поголеми од потребното и така чувајте ги на суво место.

- Џемперите се најчувствителното парче облека од зимската гардероба, затоа бидете внимателни. Проветрете ги неколку часа пред пакувањето потоа започнете. Најтешките и најдебели џемпери ставете ги најдолу, а потенките над нив. Спакувајте ги во голема кутија чие дно ќе го обложите со мека ткаенина.

- За зимските здолништа важат истите правила како и за џемперите, доколку се плетени. Ако се од материјал кој лесно се тутка, погрижете се да останат закачени во гардероберот, наместо во кутија.

- Фармерките во никој случај не ги чувајте здиплени на неколку пати. Запаметете дека тексасот секогаш се оштетува и избледува на местата каде е превиткан.