Раскажи ми приказна. Приказна која ќе боли, но ќе е чиста вистина.

Сакам кога во твоите очи се рефлектира целиот мој свет. Тој вришти од радост, изобилува со магични нијанси на радост, ме тера да танцувам под сонцето.

Сакам кога си насмеан. Кога си бескрајно свој, замислен, шармантен, вљубен во мене.

Сакам кога ми раскажуваш приказни. Приказни кои ниту една жена пред мене не ги чула.

Во твоите приказни секогаш доброто го победува злото.

Таму јас секогаш сум принцезата, а ти принцот на бел коњ.

Во твоите приказни се е возможно, сите ликови се среќни, чуда се случуваат на секое ќоше.

Твоите приказни се најубавата мелодија која моите уши некогаш ја слушнале.

Но, тоа се само приказни. Баба ми секогаш ми велеше да не верувам на маж кој раскажува приказни.

Во право е. Твоите приказни се далеку од реалноста. Не сум принцеза, не си принц и никогаш нема да бидеме среќни заедно затоа што сме премногу различни.

Во реалноста, злобата е насекаде околу мене и речиси и да не се сретнувам со добрината.

Чудо никогаш и не ми се случило, а луѓето околу мене секој ден стануваат се поочајни и поапатични.

Затоа, ајде, раскажи ми приказна. Реална. Приказна која ќе боли, но ќе е чиста вистина.

Раскажи ми дека не си среќен со мене и дај ми причина да се збогуваме.

Раскажи ми дека ние не живееме во приказна и дека нема магично стапче кое ќе не натера да се сакаме силно и до крајот на животот.

Раскажи ми за тоа дека на зборовите на кои јас паднав, паднале и десетина други жени пред мене.

Раскажи ми дека ова нашето е само страст која можеби веќе на есен лисјата ќе ја покријат.

Раскажи ми ја вистината!

Автор: М.К. | Црнобело