Фотки на плажа: 5 трикови со кои ќе изгледате најубаво во костим за капење

Со најголемите тајни на професионалните фотографи и модели, до совршен изглед на фигурата на летните слики.

Доколку имате впечаток дека само на другите совршено им излегуваат летните фотки на Инстаграм и Фејсбук, а вам никако да ви успее да се прикажете во најубаво светло, не грижете се.

И вие може да научите да позирате како вистинска манекенка, затоа што клучот е во правилната поза.

За таа намена, ви откриваме кои се петте трика што ги користат професионалните фотографи и модели, а со чија примена ќе изгледате најдобро во костимот за капење на летните фотографии:

1. Исправете се

Ако се држите подгрбавено и склопчено, автоматски ќе изгледате пониски, нозете и рацете ќе ви делуваат пократки отколку што навистина се, а и целата силуета може да ви биде искривена.

2. Ставете ги рацете на колковите

Прекрстете ги рацете во лактовите и ставете ги на колковите – како да се лутите и викате на некого. Припазете и на положбата на дланките. Доколку со рацете цврсто ја стиснете половината, а прстите ги приближите што е можно повеќе, визуелно ќе го стесните струкот во значителна мера, постигнувајќи ефект на песочен часовник.

3. Испакнете ја вилицата

Ако го потенцирате долниот дел од лицето, автоматски вратот ќе ви изгледа подолго, потенко и поубаво (а со тоа и целата фигура), додека лицето ќе ви се затегне.

4. Сликајте се од полупрофил

Сте забележале ли дека повеќето ѕвезди на црвениот килим, им позираат на фотографите така што првин ќе им го свртат грбот, а потоа ќе се завртат кон објективот во полупрофил? Во таква поза, мнозинството излегува најдобро на фотографиите, затоа што силуетата на телото поприма совршен изглед, особено ако едната нога ја држите испружена, а другата лежерно ја свиткате во коленото.

5. Жабја перспектива

Нека личноста која ве слика пополека се спушти и направи фотографира одоздола. На тој начин, добивате сосема нова перспектива – нозете ви изгледаат подолги од што навистина се, а градите како да им пркосат на законите на гравитацијата.

 М. А. | Црнобело