Бебе кога? Како да одговорите на „клише“ прашањата после свадба?

Направивте свадбена веселба со многу гости и сите уживаа во прекрасната атмосфера. Заврши свадбата, па следат фотки, видеа, честитки и неизбежните „клише“ прашања што скоро сите ги поставуваат.

Иако повеќето се добронамерни, некои прашања знаат да ги изнервираат и најсмирените тазе брачни парови.

Ние ви предлагаме како да се снајдете со одговори:

„И? Како е сега?“

Уште не поминала ни една недела од свадбата, се поставува прашањето „како оди брачниот живот?“ „Исто како претходно или?“ Со ова прашање обично луѓето сакаат да искажат интерес за вас, па не се лутете ако ви го поставуваат безброј пати.

Само насмевнете се и одговорете искрено – дека уживате во новото животно поглавје.

„Бебе кога?“

Ова прашање е едно од оние кои не би требало да се поставуваат, ни после свадбата, ни понатаму. Бебето е ваш личен избор и не би требало никому да се објаснувате за тоа.

Ако сакате пристојно да избегнете да одговорите, само кажете дека моментално сте фокусирани на уживањето во бракот и не размислувате за иднината.

„Ќе го менуваш презимето?“

Овде нема вистински или погрешен одговор бидејќи сé зависи од вашиот избор. Искреноста е најдобра опција, освен ако сметате дека тој/таа што прашува е наметлив или не ви е толку близок за да знае.

„Уште не сум сигурна“ или „Ќе видиме“ се сосема прифатливи одговори.

„Ќе купувате куќа?“

Без оглед дали живеете во сопствен или изнајмен стан, кога сте во брак скоро сите ги интересира дали новиот живот ќе го започнете во нов дом. Сите си имаме различни планови за иднината, па ова прашање најдобро е да одговорите со некоја шега.

М. В. | Црнобело