14 евтини трикови кои ќе ви го олеснат кампувањето

Кампување – преубава авантура за оние кои имаат доволно храброст да се соочат со предизвикот. Можеби ќе ја немате удобноста на хотелот, но затоа ќе имате прекрасен поглед кон ѕвезденото небо, мирисот на шумата или звукот на морските бранови.

Оние кои се обожаватели на шаторите и кампувањето велат дека не би го менувале одморот за ништо друго на светот.

Па доколку се решите за едно поалтернативно летување, одлично ќе ви се најдат овие лесни и евтини трикови со кои ќе си го направите престојот во шатор попријатен:

Детски шарени „плочки“ во замена за под

Лесни за составување, пријатни за газење и ќе му дадат одличен изглед на вашето место за одмор.

Голема светилка за во шаторот

Прицврстете мала батерија на огромна бела туба полна со вода и осветлете ја внатрешноста на шаторот со само еден извор на светлина.

Чкорчиња во тегла

Внимaвајте да не ви се наводенат, па за таа цел заштитете ги во стаклена тегла која ќе ја обложите со хартија за брусење на капкот со чија помош брзо и лесно ќе ги запалите.

Тоалетна хартија во кутија

Заштитете ја тоалетната хартија од бубачки и бактерии. Едноставно направете отвор на обична чиста кутија и додадете мала врвка за закачување.

Зачини во Тик-Так кутии

Искористете ги малите кутивчиња од бонбони за различни зачини, за да не мора да носите цело пакување или огромна тегла.

Свеќи на тенки стапчиња

Наместете високи свеќи на тенки стапчиња кои лесно се забодуваат во земја. Ќе ви дадат дополнителна романтична светлина, само внимавајте да не предизвикате пожар.

Ливчиња од сапун

Наместо да го носите насекаде целиот сапун со вас, изрендајте тенки ливчиња од истиот за еднократна употреба.

Ремен за закачување околу дрво

Употребете стар цврст ремен кој ќе го поставите околу дрво и мали куки за закачување на сите домаќински работи кои ќе ви бидат потребни за подготовка на храната.

Јаглен за скара во картонска кутија

Наместо да носите цела вреќа наполнете една картонска кутија за јајца со парчиња јаглен. Лесно достапен и воедно ќе имате и хартија за потпалување, за секој случај.

Жалфија во огнот против комарци

Комарците знаат да бидат вистинска дневна (и ноќна) мора за време на кампување. Додадете малку жалфија во огнот, миризбата ќе ги растера овие здодевни инсекти.

Памучни дискови натопени во восок

Сигурно се прашувате во што е трикот. Едноставно – памучните дискови натопени во восок ќе го запалат огнот за неколку секунди. Имајте неколку при рака, доколку немате доволно хартија за потпалување.

Замрзнати шишиња или туби со вода во фрижидерчето

Освен што ќе имате постојано ладна вода за пиење, тие истовремено ќе го ладат и остатокот од храната која ја чувате во преносното фрижидерче.

Мини чешма од голема туба

Големата туба за вода може многу едноставно да ја претворите во чешма за миење раце со додавање на едноставен чеп за полесно истурање вода.

Самолеплива лента околу шише со вода

Никогаш не знаете кога ќе ви затреба самолеплива лента, па обложете неколку слоеви околу шишето со вода, за да ви биде на дофат.

(О)Милена | Црнобело