Зошто најдобрите другарки наликуваат една на друга?

„Сигурно не сте сестри?“ е прашањето што многупати го слушнале бројни блиски пријателки. А, постои и сосема логична причина зошто тоа е така.

Колку ли само пријателски двојки сте запознале, помислувајќи дека станува збор за сестри? A, понекогаш и цело женско друштво знае да изгледа речиси идентично. Притоа, не станува збор само за лична перцепција, или, пак, за сличната облека која ја носат, велат експертите.

Истражувањето објавено во „Society for Personality and Social Psychology“, посочува дека постојат повеќе причини поради кои одредени луѓе изгледаат како изгубени роднини на своите најдобри пријатели, а тоа е особено забележливо кога се жените во прашање.

Еден од важните фактори е чувството на емпатија, односно човековата потреба за поврзување со оние кои имаат слични размислувања на нашите, а понекогаш и изгледаат како нас, иако ние самите не сме во состојба тоа да го видиме.

Затоа, неретко гледаме високи жени во друштво на други дами со завидна висина, две најдобри пријателки со заоблени задници и скромен граден кош, изразито слаба девојка во пар со уште една слична на себе, итн. Ваквото здружување не мора да биде правило, но често се случува на несвесно ниво.

Втор значаен фактор е дотерувањето, односно изборот на слична шминка, фризура и облека...делумно поради истите трендови кои ни се допаѓаат и нам и на најдобрата другарка, но и поради желбата за прифаќање од страна на општеството.

Најинтересната од сите е причината поради која најдобрите другарки почнуваат да наликуваат и во цртите на лицето, а го објасни порталот Psychology Today:

„Со тек на време, пријателите би можеле да почнат да си наликуваат, бидејќи користат исти фацијални експресии. Многу смеење и мрштење на идентичен начин, може да доведе до благи промени во изгледот на лицето.“

М. А. | Црнобело