Знаци кои покажуваат дека вашиот дом е мета за кражби

Кражбите во домовите не се ништо ново, а во последно време стануваат многу чести.

Но, доколку сте мислеле дека вашиот дом е безбеден или дека крадците ги напаѓаат само луксузните куќи на богатите, се лажете.

Сигурно има нешто што пропуштате и што можеби го прави вашиот дом привлечен за нив, иако не мора да значи.

Во секој случај, ако ги знаете „ранливите точки“ и работите на кои паѓаат крадците, ќе ви биде многу полесно да го обезбедите домот и да спречите кражби.

Ова се знаците кои покажуваат што ги прави домовите привлечни за кражба:

Крадците преферираат лесна мета

За да ограбат дом, на професионалците им се потребни од 90 секунди до 2 минути, а најголем дел од времето трошат на наоѓање вредни предмети.

Затоа, тие наоѓаат лесни мети, каде лесно ќе влезат – станови на приземје, куќи што не се гледаат од патот, станови со слабо затворени и незаштитени прозорци, како и незаклучени врати.

• Секогаш заклучувајте ја влезната врата од станот и од влезот на зградата или портата од куќата. Исто така добро затворајте ги прозорите и вратите од терасите. Ако живеете на пониските катови, ставете решетки на прозорците.
• Не го оставајте клучот под чергиче, бидејќи секој прво ќе побара таму. Подобро оставете го кај сосед на кој му верувате.
• Ставете аларм или камера ако сакате да бидете најбезбедни, посебно ако чувате вредни работи во домот.
• Чувајте куче, бидејќи големите кучиња-чувари секогаш успеваат да заплашат голем дел крадци.
• Ако живеете во куќа, влезната врата секогаш треба да ви биде добро осветлена.

Идеални објекти за ограбување – празни домови

Најголемиот број на кражби се случуваат во летен период кога многумина се на одмори и домовите ги оставаат празни. Крадците пратат постојано кои домови се празни, а за тоа постојат неколку трикови, меѓу кои најпознат е следењето на сандачето. Исто така тие оставаат летоци пред врата, па ако никој не го земе подолго време, знаат дека нема никој.

• Ако живеете долго време на исто место, замолете некој од соседите да ви ја собира поштата што ви стига во сандачето.
• Кога сте дома, редовно празнете го сандачето и не оставајте летоци пред врата за да не создадете лажно мислење кај крадците.
• Не ги оставајте завесите отворени, за да не може никој да гледа што се случува во домот.

Крадците пребаруваат мали предмети и знаат каде најчесто се кријат

Првично, крадците се заинтересирани за пари, накит и електроника. Дизајнерската облека и аксесоари се исто така мета, како и парфеми и оружје.

Чувајте ги парите во банка, а накитот и другите вредни работи на безбедно место. Фиоките со долна облека, полиците за книги и шкафчиња не се сметаат за безбедни места. Ако не сте дома, чувајте ги вредните работи на места каде што тие никогаш не би побарале нешто вредно, како на пример место каде чувате храна, фрижидер и сл.

Крадците ги следат социјалните мрежи

Кога објавувате фотографии од одмор на социјалните мрежи, ако не ви се заштитени, не ги гледаат само блиските, туку можеби и некој потенцијален натрапник.

• Не ставајте премногу информации за себе на интернет и не зборувајте на социјални мрежи за планови за одмор.
• Не ширете фотки од вредни работи, пари и шопинг.
• Не додавајте непознати за пријатели.

М. М. | Црнобело