Зошто воздухот мириса поубаво после дожд?

Веројатно барем еднаш сте се запрашале зошто го обожавате мирисот на дожд и како тоа секогаш поубаво мириса кога асфалтот е влажен?

Време е да си го одговорите ова прашање.

Пред да падне на земја, дождот е само вода, течност без боја, мирис и вкус. Но, откако дождовните капки ќе ја допрат земјата, доаѓа до интеракција меѓу нив и земјата.

Овој „мирис на дожд“ дури има и име – petrichor. Потекнува од грчкиот збор petra – односно камен и ichor – што претставува течност која како крв наводно течела во вените на боговите.

Феноменот прво го објасниле двајца австралиски научници во далечната 1964-та година:

Карактеристичниот мирис на дождот настанува од мешањето на водата со маслата кои некои билки во природата ги испуштаат за време на сушниот период, а потоа испаруваат заедно со дождовните капки.

Дождовните капки кога паѓаат на земјата, во себе заробуваат по малку воздух. Овие меурчиња воздух потоа се движат како во шише шампањ, се додека не се пробијат на површината и таму испуштат микро честички познати како аеросол.

Научниците сметаат дека токму тој аеросол во себе ја носи онаа „арома“ на дожд.

М. Д. | Црнобело