Памет и интелигенција - Зошто некои луѓе се попаметни од другите?

Една од причините поради кои луѓето се чувствуваат неудобно да зборуваат за интелигенција е што сметаат дека таа не може да се надградува.

Исто така, наследниот фактор само делумно влијае врз тоа колку некој е паметен или интелигентен. Постојаната стимулација на мозокот помага во развивање на различни делови од него, а со тоа се „вежба“ и интелигенцијата.

Со години се верувало дека доколку детето има интелигентни родители и тоа ќе биде интелигентно. Исто така, знаеме и дека памет и интелигенција не значат исто, но се во постојана корелација.

Најкратко и најопшто кажано, изборите се оние што ги прават луѓето попаметни од другите, додека способноста да собираат информации и да ги употребуваат правилно е карактеристика на интелигенцијата.

Од друга страна, интелигентните луѓе не се неопходно и паметни. Најголемиот проблем се појавува кај оние кои цел живот се „протнуваат“ благодарение на интелигенцијата, без многу да размислуваат. Сепак, за сите доаѓа момент во животот кога треба да размислат и да се преиспитаат и да одлучат што е најпаметно да направат за понатаму.

Паметните луѓе размислуваат, планираат, согледуваат причини и последици и врз основа на тоа носат одлуки. Интелигентните, пак, попрво би го избрале најлесниот и најкраткиот пат, што не значи и дека е најдобар. Токму поради тоа неретко се случува помалку интелигентна личност попаметно да ја „изигра“ ситуацијата.

Затоа, треба да се знае дека паметот не е дефиниран со коефициентот на интелигенција и не е само збир на когнитивни способности. Понекогаш, дури и да сме генијалци според тестовите за интелигенција, потребно е да ги согледаме нештата од сите страни, за да можеме најпаметно да постапиме.

Е. Д. | Црнобело