Легендата за Иштар, првата божица на љубовта и војната

Од Афродита до Чудесна жена, сè уште нè фасцинираат моќните женски протагонисти. Овој интерес може да се проследи до најраните пишани записи. Иштар (зборот доаѓа од акадски јазик, позната е и под името Инана) е првото божество за кое имаме напишани докази.

Таа била тесно поврзана со романтична љубов, фамилијарна љубов, љубовните врски меѓу заедниците и сексуалната љубов.

Таа била и воинствено божество со силен капацитет за одмазда. Иштар е љубовно божество кое е застрашувачко и на бојното поле.

Нејзината убавина била предмет на љубовната поезија, а нејзиниот бес се споредувал со деструктивната бура. Ова е легендата за божицата Иштар, првата божица на љубовта и војната.

Најраните песни за Иштар биле напишани од Енхедуана, првиот индивидуално идентифициран автор. Енхедуана е историска личност која живеела во Ур, еден од најстарите урбани центри на светот.

Таа била свештеничка на богот на месечината и ќерка на Саргон од Акад, првиот владетел кој ја обединил северната и јужната Месопотамија.

Во нејзината поезија ја открива различноста на Иштар, вклучувајќи го и нејзиниот капацитет за вооружени конфликти. На бојното поле, способноста на божицата да ги решава судбините обезбедувала победи. Во љубовната магија, моќта на Иштар можела да ги смени романтичните чувства.

Иштар е опишана како убава, млада жена. Со нејзиниот љубовник, Тамуз, чинат протагонисти на една од првите љубовни приказни во светот.

Најпознатата приказна за Иштар започнува со одлуката на божицата да го посети царството на нејзината сестра, Ерешигал, кралицата на подземјето. Иштар наводно ја посетува сестрата за да ја оплакува смртта на нејзиниот зет, кој се појавува во Епот за Гилгамеш.

Но другите богови во приказната го гледаат овој потег како обид за преземање, бидејќи Иштар била позната како исклучително амбициозна божица.

Откако ќе пристигне во домот на Ерешигал, Иштар се спушта низ седумте порти во подземјето. На секоја порта е наложено да се отстрани облеката. Кога пристигнува пред својата сестра, Иштар е гола, а Ерешигал веднаш ја убива.

Нејзината смрт има ужасни последици - прекинување на сексуална интимност и плодност. Еа, богот на мудроста, ја оживува Иштар и ја враќа во горниот свет.

Во горниот свет Иштар го гледа Тамуз, нејзиниот маж, како се релаксира на тронот, очигледно недопрен од нејзината смрт. Бесна им наредува на демоните да го убијат. Улогата на Иштар во смртта на нејзиниот сопруг ѝ ја дава репутацијата на божица со одмазлива природа.

Жените и одмаздата се покажале како популарна комбинација во митовите на античка Грција и во Рим. Оваа тема ја фасцинира публиката до денешен ден.

Ашера | Црнобело