Добротворна организација им помага на сирачињата од Уганда да го покажат неверојатниот талент за танцување (видео)

Во склоп на една добротворна организација, дечињата од Уганда кои останале без родители го покажуваат нивниот неверојатен талент за танцување преку забавни видеа.

Организацијата Masaka Kids Africana им помага на децата од Уганда да го изградат својот живот преку нивните таленти.

Во склоп на организацијата, децата од Уганда кои останале без еден, или без двајцата родители, имаат можност за образование, но и за забава – сите деца се неверојатни танчари, па редовно снимаат видеа со забавни африкански танци.

Според веб-сајтот на организацијата, во Уганда има најмногу сираци во светот – околу 2,4 милиони деца. Причини за ова има безброј – од епидемијата со СИДА и сиромаштијата, па сè до многуте конфликти во државата.

Токму поради тоа, организацијата си дала цел да им обезбеди засолниште, храна, облека образование и медицинска нега на овие деца.

„Masaka Kid Africana ги спонзорира децата кои поминале низ најлошите нешта што можат да му се случат на едно дете – но преку танц и песна и споделување на нивната љубов кон Уганда, овие деца се поврзуваат едни со други и со светот. Тие го гледаат нивниот потенцијал – тие имаат надеж за нивната иднина“, пишува на сајтот на организацијата.

Организацијата има згрижено деца на секоја возраст, а танцувањето им се допаѓа и нив, и на нивната публика. Покрај видеата што ги објавуваат, децата понекогаш имаат и настапи во живо, кои секогаш биле проследени со големи овации.

„И покрај трагедијата која ги погодила нивните млади животи, децата се полни со надеж, музички надарени и многу забавни“, велат од организацијата.

Навистина одличен начин да им се помогне на овие дечиња, но и да се поттикнат да ја ценат својата култура и да ги покажат нивните неверојатни таленти.

Погледнете дел од кореографиите на овие млади талентирани танчари:

Спирова С. | Црнобело