Оптичка илузија што го „полуде“ Twitter – дали прстените се движат и ја менуваат големината?

Прстените ротираат без да се движат во ниту еден правец, но сепак твитерџиите се убедени дека како што се менуваат насоките на стрелките, така и прстените се прошируваат, стеснуваат и поместуваат. Оваа оптичка илузија дефинитивно ќе си поигра и со вашиот мозок. 

Јапонскиот артист познат како Jagarikin неколкупати ја има збунето јавноста со неговите оптички илузии и сега повторно го направи тоа.

Неодамна, на неговиот Twitter профил, артистот сподели оптичка илузија што веќе е споделена над 12.000 пати и за која корисниците велат дека навистина си поиграла со нивниот мозок.

Оптичката илузија е гиф на кој се претставени два прстени со жолта и сина боја кои постојан ротираат, но не се поместуваат во ниту еден правец.

Во средината има стрелки кои создаваат илузија дека прстените се движат во нивна насока. Во некои моменти изгледа и како прстените да се прошируваат и стеснуваат. Уште поинтересно е што дури и ако ги покриете стрелките со прстите, сепак ќе ви се чини како прстените да се движат, зголемуваат и намалуваат.

Наводно, илузијата на движење и менување на големината е поради боите на прстените кои се разликуваат од заднината и постојано ротираат. Друго објаснување е дека надворешните линии на двата прстена, кога се вртат не се поклопуваат во иста боја, па тоа создава илузија на оддалеченост или зближување.

Спирова С. | Црнобело