Јапонските цреши - потсетник дека животот е прекрасен, но краток и минлив

Пролетта во Јапонија е еден од најубавите периоди и вистинска туристичка атракција заради цветањето на црешите Сакура. Дрвјата се навистина раскошни, а глетката прекрасна и бесценета.

Нежните цветови иако траат кратко, се длабоко вкоренети во јапонската историја, култура и идентитет. Расцветувањето на јапонските цреши е симбол за почеток на еден нов живот.

Во Јапонија се одржуваат двонеделни фестивали во 11 градови. Овие денови се сметаат за пресвртна точка во животот на Јапонците и се одлични за нови почетоци (почнување нов бизнис, склопување брак и сл.).

Оваа година, розовата бајка во Токио се очекува да почне значително порано од вообичаено – во полн цвет црешите би биле околу 22 март.  

Црешите се сметаат и за метафора за животот, потсетник дека животот е прекрасен, но краток и минлив. Тие се во полн цвет неколку дена, за многу брзо потоа да паднат до последно ливче и за миг да исчезне целата магија. 

Е. П. | Црнобело