8 совети за ефикасно пакување кога немате многу простор во куферот

Пред да почнете со пакување, прашајте дали во хотелот/вилата каде што ќе престојувате се нудат крпи и фен за коса. Ако одговорот е да, нема потреба да ги носите овие работи.

Иако сите сакаме да патуваме, подготовките, посебно пакувањето, можат да бидат навистина стресни.

Неретко, сакајќи да се осигураме дека секогаш ќе го имаме она што ќе ни притреба, настојуваме да пакуваме сè и сешто, како пет пара фармерки и четири фустани за 5-дневно патување, и полниме повеќе од еден куфер.

Па, како да се спакувате ефикасно, особено кога немате многу простор?

Дали навистина ви треба лаптоп?

Ако одите на одмор, а не на деловно патување, зарем има потреба да носите и лаптоп?

На вашиот смартфон ги имате сите алатки што би можеле да ви притребаат во текот на патувањето – од мапи до онлајн купување билети за музеи – па не мора лаптопот да ви зафаќа место.

Избегнувајте да носите книги

Ако сте страстен читател, нормално дека ќе сакате да понесете и книга на вашиот одмор. Но, најдобро не земајте повеќе од една „физичка“ книга и ќе заштедите многу простор.

Ако мислите дека ќе прочитате повеќе од една книга, барем додека сте на одмор дајте им шанса на електронските изданија.

Понесете ги само неопходните апарати за коса

Нема потреба да носите цел фризерски салон кога одите на одмор. Ако е лето, многу подобро е да ја оставите косата да ви се исуши природно наместо да носите цел фен. Всушност, многу хотели имаат и фенови, па овој проблем е решен.

Ако сепак секојдневно користите некој апарат, како пегла за коса, понесете го само тоа, но не и фигаро и четка и што уште не.

Некогаш ни крпите не се неопходни

Пред да почнете со пакување, прашајте дали местото каде што ќе отседнувате нуди и крпи.

Ако одговорот е да, нема потреба да го полните куферот со крпи.

Бидете реалистични со облеката

Ако одморот трае пет дена, дали сигурно ќе износите четири пара фармерки, пет фустани и три здолништа?

За да не го преполните куферот со облека, направете си комбинации за секој ден од вашето патување и спакувајте ги само тие парчиња.

Ако сте ограничени со простор, потрудете се едно парче да вметнете во повеќе комбинации.

Истото важи и за чевлите

Кога ќе ги правите комбинациите со облека, потрудете се да можете да ги носите со најмногу два пара чевли.

Ако станува збор за просечно патување од најмногу 10 дена, сосема доволно ќе ви бидат чевлите со коишто ќе патувате и уште еден пар.

Нормално, ако одите на плажа, понесете и влечки или сандали за таму.

Исчистете го несесерот

За да не носите цел куп неупотребливи шминки и козметика, детално исчистете го несесерот.

Фрлете ги празните и старите амбалажи и оставете го само она што навистина го користите.

Не носете скап накит

Бидејќи секогаш постои можност да загубите нешто кога сте на патување, немојте да ризикувате и оставете го скапиот накит дома.

Спирова С. | Црнобело