Се срамат од развод и уште 8 необични навики и традиции на луѓето во Јужна Кореја

Не делат сметки во ресторан и толку се загрижени за својот углед, што не ни бараат помош за проблемите со менталното здравје - кои други навики и традиции можете да ги сретнете во Јужна Кореја?

Јужна Кореја станува поприсутна во поп-културата благодарение на сериите како Squid Game и популарниот бенд BTS.

Поради ова, стануваме и посвесни за интересните навики и традиции на Корејците кои се многу поразлични од нашите.

Неколку детали од секојдневието на Корејците кои сигурно ќе ве изненадат:

Помладите многу ги почитуваат постарите

Уште од најрана возраст, нè учат дека треба да ги почитуваме постарите, но Корејците одат чекор подалеку.

Кога се запознаваат со некого, тие задолжително прашуваат за возраста бидејќи дури и ако е само една година постар, ќе му покажуваат почит како на многу повозрасна личност.

Односот кон постарите секогаш е поразличен и помладите се особено внимателни со нивните зборови и гестикулации.

Кога ќе се родат, бебињата имаат една година

Кај нас бебето полни една година кога ќе помине една година од датумот на неговото раѓање.

Но, во Јужна Кореја се смета дека детето има една година на денот кога ќе се роди.

Слично броење на годините има и во Кина.

Покажуваат благодарност кон предците со богата трпеза

И кај нас има обичај да се дава ручек кога ќе почине некој. На празниците како Духовден, пак, е нормално да се раздава храна на гробиштата во чест на починатите. 

Во Кореја ваквото покажување почит и благодарност е цела гозба.

Саканите на починатиот се собираат и поставуваат богата трпеза во негова чест. Со оваа церемонија, тие се надеваат и дека ќе добијат благослов од починатата личност.

Не делат сметка во ресторан

Во многу земји во светот е нормално да се дели сметката во ресторан или секој да си плати за своето.

Но, во Кореја повеќето почитуваат друго правило – плаќа оној кој е иницијатор за средбата во ресторанот.

На овој начин тие се ротираат, односно денес иницијаторот ќе биде еден пријател, утре друг…

Секогаш ги соблекуваат чевлите пред да влезат во нечиј дом

Како и во многу други азиски земји, влегувањето во нечиј дом со чевли е големо непочитување.

Според Корејците, со ова се валка домот на домаќинот, и со тоа се покажува непочитување.

Давањето подароци е ритуал

Корејците се навистина дарежливи и уживаат во купувањето подароци за саканите.

А, имаат и цел ритуал кога даваат подарок.

Подарокот секогаш е завиткан во убава хартија, најчесто со светли бои, а се дава со двете раце.

Примачот, пак, не треба да го отвори подарокот пред личноста што му го дала, туку кога ќе биде сам.

Достоинството е многу важно

Во корејскиот јазик постои збор – kibun – кој нема конкретен превод на македонски, но може да се протолкува како гордост, достоинство и слично.

Корејците секогаш пробуваат да го почитуваат kibun-от на другите.

Ова значи дека секогаш се смирени, па дури и кажуваат по некоја мала лага, за да ја зачуваат хармонијата во односот.

Многу им е важно туѓото мислење

Додека ние пробуваме да се ослободиме од опсесијата со туѓото мислење за нас, во Јужна Кореја е многу важно како изгледате во очите на другите.

Корејците преземаат драстични мерки за да скријат „срамни“ детали од животот, како развод, лош академски успех или невработеност.

Всушност, повеќето не бараат помош ни за проблеми со менталното здравје од страв дека ќе си ја нарушат репутацијата.

Многу се суеверни

Иако Јужна Кореја е напредна земја, голем дел од населението верува во суеверија.

Едно од најпопуларните е верувањето дека бројот 4 е баксузен. Па, честопати се изостава кога се нумерираат домови, паркинг-места и слично.

Тие избегнуваат и да подаруваат четири работи одеднаш.

Спирова С. | Црнобело